Titulo nga ‘Monsignor’ alang sa mga pari gipa-undang sa Santo Papa

Nagmando ang Santo Papa sa iyang Secretariat of State nga undangon ang pag-aproba sa mga request nga hatagan og titulo nga ‘monsignor’ ang mga kaparian.

Kini sumala sa report sa CatholicCulture.org ug Italian newspaper nga Il Messagero, ug ang maong mandato epektibo hangtud karong Oktubre apan walay giingon nga klaro nga pagdeklara kung mulampas pa sa maong bulan ang mandato sa Santo Papa.
Sumala sa report sa nrconline.org gihimo ang maong mandato isip pagpangandam sa ipahigayong panagtagbo sa santo papa ug pipila ka cardinal aron sa posibleng himoong kabag-ohan sa Simbahan.

Ang usa ka pari ginahatagan sa titulo nga ‘monsignor’ pinaagi sa rekomendasyon sa Obispo sa iyang diyosesis ug mahatag lang kini pinaagi sa pag-aproba sa Vatican.

Sumala usab sa maong report, ang moratorium wala nagdumili sa mga miyembro sa Vatican diplomatic corps nga mahatagan og titulo nga ‘monsignor’ nga konektado sa ilang mga trabaho isip representante sa Holy See. (@dcherald)