Peace of Sacrifice gi-uyog

Sa okasyon sa Eid’l Adha kon Peace of Sacrifice sa mga Muslim nahitabo ang kusog nga linog nga hinungdan sa pagkaguba sa mga karaang simbahan ug pagkamatay sa pipila ka tawo sa kabisay-an.
Ang Eid’l Adha usa sa mga balaang adlaw sa mga Muslim ug wala damha nga nahitabo ang maong linog nga 7.2 magnitude ang kakusog.
Pipila sa mga Muslim nga nagsaulog sa maong adlaw sa ilang tagsa-tagsa ka mga mosque didto sa kabisay-an nangalisang sa kakusog sa maong linog.
Ang Eid’l Adha usa ka religious holiday alang sa mga Muslim sa tibuok kalibutan isip paghinumdom sa gihimo ni Propeta Ibrahim (Abraham) nga i-sakripisyo ang iyang unang anak nga lalaki nga si Ismail (Ishmael) isip pagtuman sa kagustohan ni Allah apan wala kini gidayon ni Allah ug gipuli ang usa ka karnero isip maoy halad kaniya.
Tungod gi-deklara ang adlaw nga non-working holiday dinhi sa Pilipinas, walay klase nga gihimo sa mga pribado ug pampubliko nga mga skwelahan ug walay mga studyante sa mga skwelahan ang naapil sa maong katalagman.
Nangalisang ang tanan ilabi na kadtong anaa sa epicenter sa linog nga mao ang Carmen sa Bohol diin pipila ka mga building ang nanga-danyos apil na usab niini ang usa sa mga atraksyon sa Bohol nga mao ang Chocolate Hills diin naguba ang viewing deck niini. Pipila usab sa mga hulagway sa iladong chocolate hills ang makita sa social media nga nanga-tipak ug nahugno.
Usa sa mga diyosesanong pari sa Dabaw nga si Fr. Victor Isidoro Gilay taga-Loboc, Bohol nga miuli sa ilang ancestral house ang naka-sinati sa maong panghitabo. Miuli siya aron sa haya sa iyang amahan.
Sa ubang syudad sa Bohol, pipila ka karaang simbahan ang nangatumpag sama sa simbahan sa Immaculate Conception Church sa Baclayon, St. Peter the Apostle Parish sa Loboc, Nuestra Señora del Carmen sa Carmen, Bohol, Parroquía de Santa Cruz sa Maribojoc, San Isidro Labrador Parish sa Tubigon, Holy Trinity Parish sa Loay, Our Lady of the Assumption sa Dauis ug ang Nuestra Señora de la Luz sa Loon.
Ang kampana sa Basilica del Minore del Sto. Nino sa Cebu City nahugno kauban ang belfry. Maayo na lang, usa ka motor lang ang na-danyos ug nangatipak usab ang mga bahin sa Cebu Metropolitan Cathedral nga nahimutang duol sa Basilica sumala sa mga report.
Nanawagan ang National Historical Commission of the Philippines nga bantayan sa mga tawo ang ilang mga simbahan kay kabahin kini sa ilang kinabuhi ug kasaysayan isip katawhan ug magtotoo.