Pagtoo gipakita sa mga parokyano sa Blessed John Paul II Parish

Kung huna-hunaon, unsa kaha ang mahitabo kung anaa ang Obispo ug mga kaparian sa Misa pero walay mga tawo?
Kini ang napamalandongan ni Abp. Romulo G. Valles mahitungod sa pagtambong sa mga katawhan sa ika-duhang kapistahan sa Blessed John Paul II Parish sa Tugbok, Davao City, Oktubre 22.

Sa iyang homiliya atol sa Misa, giingon ni Abp. Valles nga gikalipay niya nga makita ang mga katawhan nga mitambong sa misa ug miambit sa sakripisyo nga gihimo sa Eyukaristiya.
Nakapa-dasig kaniya ug sa mga kaparian nga atimanon ang pagtoo sa katawhan sama sa ilang patron nga si Blessed John Paul II nga inila isip maayong pari, obispo ug santo papa tungod gitabangan niya ang pagtoo sa matag usa.

Gipahimangno-an usab niya ang kaparian nga dili kaayo lisud-lisuron ang mga tawo ug kung mahimo dungagan pa ang pag-abi-abi aron ma-affirm kon mapamatud-an sila sa ilang pagtoo.
Gihatagan usab ni Abp. Valles ang pulong nga ‘kalamboan’ nga makita sa tema karong tuiga nga: “Hiniusang Panaw sa Kalamboan uban ni Beatu Juan Pablo II”.

Giingon niya nga ang kalamboan nga wala masubay sa tinood nga angay sa tawo, dili tinood nga kalamboan ug ang kalamboan nga wala nagahuna-huna sa lihok sa sala, peke.
Dugang niya nga tungod kay Blessed John Paul II, nawala ang credibilidad sa Communism sa Europa tungod kanunay niya ginatudlo ang tinood nga dagway sa kalamboan sa tawo.
“Ang kalamboan dili mahitabo kung isog ang sala. Pildi ang sala sa gahom ni Hesus,” sumala niya.
Dugang na usab niya nga “ang kalamboan nga walay spiritual, religious dimension, fake nga kalamboan.”

Giingon ni Abp. Valles nga ang kalamboan wala lamang galantaw sa kinabuhi sa pagkakaron apan nagalantaw kini sa gingharian sa Dios didto sa langit.
Sumala ni Abp. Valles, ang mga panghitabo sa kalibotan sama sa linog sa Bohol nagapahinumdom nga bisan maanindot ang kinabuhi ug kalamboan dinhi sa kalibutan, dili angay kalimtan nga ang tanang katawhan nagpaabot sa katuman sa pag-uban sa Dios didto sa langit nga mao ang kahingpitan sa kalamboan.
Ang Oktubre 22 ang gipili sa Vatican niadtong 2011 tungod mao kini ang anibersaryo sa liturgical inauguration sa iyang pagka-santo papa nga nagsugod niadtong 1978.
Kasagaran ginahimo ang pagsaulog sa kapistahan sa usa ka santo sa adlaw sa iyang pagkamatay apan ang adlaw sa iyang kamatayon nga Abril 2, kasagaran matunong sa pagsaulog sa semana santa. Gituyo sa Vatican nga matag Oktubre 22 ang kasaulogan sa kapistahan aron ma-garantiya nga masaulog ang kapistahan ni Blessed John Paul II matag tuig.