NFP Seminar Gipahigayon sa San Isidro Parish

Sa ikatulong higayon, nagpahigayon na usab ug Natural Family Planning (NFP) Seminar ang San Isidro Labrador Parish sa Catalunan Grande niadtong Octobre 13, 2013. Ubay-ubay ang nitambong nga mga magtiayon ug sila nipadayag nga makatabang gayud ang maong seminar alang sa pagplano ug pagpahimutang sa ilang pamilya. Ang maong seminar gipanguluhan ni Mrs. Cora Prudente ug mga kaubanan sa parokya. Nitabang usab ang team sa Couples for Christ Gift of Life Ministry nga gipanguluhan ni Bro. Rolly Acuña.

Ang Natural Family Planning usa ka pamaagi unsaon pagpangandam sa pagmagdus ug pag “birth spacing” pinaagi sa Billings Ovulation Method nga maoy gitudlo dinhi sa atong Archdiocese sa Davao. Wala kini mga side effects tungod kay natural man ang pamaagi ug taas usab ang iyang success rate. Daghan na ang mga nagtestimonya bahin niining BOM ug sila nipadayag nga nilambo ang ilang relasyon isip magtiayon. Tumong sa parokya sa San Isidro Labrador nga ila kining himuon matag bulan.