“Mindanao Catechists called to Evangelize”

Nahitabo ang ika-4 nga Mindanao Catechists’ Convention niadtongOktobre 16-19, 2013 didto sa Archdiocese of Ozamiz, ubos sa tema “Mindanao Catechists Called to Evangelize.” Ang atong subregion nagpadala og igong partisipante alang niini.
Ang kapin 200 ka mga partisipante gikan sa 16 ka mga diyosesis sa Mindanao nakahigayon sa pagdugang sa ilang kaamguhan ug kamaohan sa panginahanglan karong panahona sa bag-ong pagsangyaw sa Ebanghelyo (NE)nga mao na karon ginatagaan og kusog nga pagtagad sa Simbahan nga ania nagkinabuhi niining bag-ong milenyo.
Tulo ka mga pamahayag ang gipamalandongan sa mga partisipante, 1.Ang NE for the Life of Church of Mindanao, gihatag ni Bishop Jose Manguiran, 2. Living and sharing the Christian Faith, gihatagni Sr. Stella Marie Llerin, OND 3. Nine year Era of NE in the Philippines, gihatag ni Bishop Guillermo Afable.
Ang bag-ong pagsangyaw sa Ebanghelyo dili na bag-o alang kanato sa Simbahan sa Pilipinas. Sukad pa sa PCP II niadtong 1991, gisugdan na kini nga gitagad tungod lagi sa bag-ong kahimtang sa kalibutan ug katawhan. Ang daan nga mga pamaagi dili na gayud haom sa sitwasyon. Apan,giangkon nato, human sa 10 katuig, nga hinay pa kayo ang pagpahigayon sa pagpahitabo niini sa mga simbahang local hangtod sa mga parokya og mga GKK. Ang siyam ka pastoral priorities sa PCP II niadtong 2001 naghatag kanato ug dugang katin-awan ug pagdasig sa pagpadayon sa pagbag-o.

Kinahanglan karon nga magtinbangay kita alang sa mamugnaon ug madasigong paningkamot sa mga lumilihok sa mga apostolado sa simbahang lokal. Ug ang labing importanteng bahin niini mao ang kabag-ohan sa mga Obispo ug mga Pari alang sa NE tungod kay sila ang gisangunan nga magdumala ug mangulo sa Simbahan. Sama sa giingon na sa PCP II, ang labing importanteng kabag-ohan nga gikinahanglan sa Simbahan mao ang pagbag-o sa mga panghunahuna, panglantaw ug pamaagi sa mga Obispo uban sa ilang mga kabulig nga mga Pari.
Sa panag-ambitay sa mga diocesan director ug coordinator sa apostolado sa Catechesis, nagkauyon ang tanan nga gikinahanglan kayo ang pormasyon sa mga pari bahin sa Catechetical ministry tungod kay nasaksihan nila nga dili kayo ginatagaan sa mga pari ang maong ministriya. Tingali tungod sa kulang nga pormasyon alang niini.

Labot pa niini, naamguhan usab nila, sumala sa National Catechetical Directory in the Philippines( NCDP), nga sa Seminaryo pa lamang, diin ang mga pari nagasugod sa ilang pormasyon, wala usab ginatagaan ug importansiya ang Catechetical ministry. Busa gisugyot nila sa mga Obispo, nga katagaan gayud kini og pagtagad sa madali nga panahon. Hangyoon usab nila ang 3 ka Catechetical Institutes dinhi sa Mindanao ( Notre Dame Catechetical and FromationCenter NDCFC), John XXIII Catechetical Center (JCC), ug Bukidnon Catechetical Institute (BCI), sa pagsugyot og programa sa pormasyon alang sa mga pari.
Ang John XXIII Catechetical Center dinhi sa Daditama, gitukod sa Archdiocese of Davao niadtong dekada 70 pa. Sumala sa nanguna sa katukuran niini, siFr. Patrice Picard, PME gitukod ang maong center alang sa pagpangandam sa mga professional nga mga Katekista(sa Davao ug Tagum, unya sa Digos ug Mati,) alang sa pagtabang sa mga pari sa parokya, ug mga Catholic Schools, sa pagpahigayon sa tibuok ministriya sa Catechesis alang sa mga hamtong, kabatan-onan, ug mga bata. Gipangakuhan usab sa Center ang pagpangandam sa mga materials nga magamit sa mga Pari ug Katekista ilabina mga materials sa Cebuano. Dayag kaayo, sukad pa sasinugdanan, nga ang JCC adunay dakong bahin sa pag-umol ug pagpangandam sa mga Pari aron matuman nila nga mahimo silang pangulong katekista sa ilang mga parokya o sa eskwelahan ug mangakuhan sa pagumol sa daghan kaayong mga volunteers alang sa maong ministriya.

Hinaot unta nga ang mga diyosesis sa DADITAMA magapadayon sa pagsuporta ug pagdasig sa atong JCC aron ilang mapadayon ang ilang tahas, alang sa subregion ug sa tibuok Minadano, ilabina alang sa panahon karon sa Bag-ong Pagsangyaw sa Ebanghelyo.