MBMG Mati surprises delegates at fellowship presentation

MATI CITY – Mapasigarbohon nga gidawat sa Diocese of Mati Mother Butler Mission Guilds (MBMG) ang duha ka bugtong major awards alang sa labing maanindot nga cultural presentation nga gitanyag sa Fellowship Night sa unang adlaw sa MBMG Mindanao Regional Conference, Septiyembre 21-22, 2013, sa Crisbel Convention Center sa San Jose, Digos City.
Ang “Best in Presentation” ug “Best in Costume” awards ang gihukman nga angayan gyud itanyag sa mga taga Baganga, Davao Oriental nga mirepresentar sa labing artistikong / etnikong “showcase” sa Minandaya nga sayaw, kompleto sa mga kahimanan o props alang niini kung itandi sa maingon nga ordinaryong mga pasundayag sa uban.
Si Fr. Joel L. Vidal, MBMG spiritual director sa Mati diocese, maoy midawat sa mga ispisyal nga plaque alang sa maong mga award, inubanan ni Sis Felinda Macado-Owen ang deputy diocesan coordinator sa ngalan usab sa Mati MBMG president Sis Ellen Andrada nga kasamtangang anaa sa gawas sa nasud.
Nagsingabot ang mga delegado gikan sa managlahing lugar sa Mindanao gawas sa Zamboanga, Basilan, ug mga nagkagubot nga mga lugar sa Sept 20, alas 9:00 sa buntag hangtud alas 5:00 sa hapon alang sa Registration ug Setting up of Exhibits.
Sa sunod nga adlaw, Sept. 21, gibukas ang Convention pinaagi sa Kasaulogan sa Sakripisyo sa Eyukaristiya nga gipangunahan ni Most Rev. Guillermo D. Afable, Obispo sa Diyosesis sa Digos, kinsa usab mibendita sa mga exhibit human sa Stos nga Misa.
Kini gisundan sa Opening Ceremony nga naglangkob sa MBMG Prayer, Invocation, Philippine National Anthem, ug Welcome Message nga gideliver ni MBMG Regional President Sis Dulia S. Sunga; unya misunod ang mga pikigpulong.
Duha ka pari ang miluwat og mga pakigpulong kabahin sa tema sa Tuig sa Pagtuo nga “Live Christ, Share Christ” – sa buntag si Fr. Danny D. Montaña, RCJ, ug sa hapon si Fr.Rico H. Dingal, DCD; samtang si Sis Lilia Pineda ang nagtapos sa panghapon nga iskedyul pinaagi sa iyang National President’s Message.
Ang Fellowhip Night sa gabii ang mabulokon nga presentasyon sa mga production numbers gikan sa University of Mindanao, Cor Jesu College, Digos City National High School, Talentadong Pinoy Grand Finalist Larvae, MBMG videos ug ang Surprise Numbers by Chapters kon diin “da best beyond expectation” ang Mati Chapter subay sa desisyon sa hurado nga gipangulohan nila Sis Remedios Gabales ug Dulia Sunga.
Sa sunod nga adlaw, Sept. 22, domingo, si Obispo Romulo T. de la Cruz sa Kidapawan maoy presider sa Kasaulogan sa Eyukaristiya; ug kini gisundan sa Awarding of Bourses ngadto sa mga seminary rectors: Fr. Kim A. Cossid sa John Paul II Seminary, ug Msgr. Abel Apigo sa St. Francis Xavier Regional Major Seminary (Remase). Closing Remarks giluwat ni MBMG Diocesan Spiritual Director Fr. Ronald Lunas, DCD.