Kinsay manubag sa mga kalamidad?

MATI CTIY – Usa ka tibuok nga adlaw ang gipunting sa mga 400 ka delegado—kaparian, kamadrihan ug layko—gikan sa tanang mga parokya sa Mati sa miaging Octubre 17, 2013 alang sa pagtuon sa mga grabe ug makapatay nga kausaban sa clima sa kalibutan, partikular sa atuang Isla sa Mindanao, ug paglikay sa mga disaster kon mahimo, samtang magplano ug magtuman sa angayang tulubagon niini.
Ang maong seminar-workshop on Disaster Risk Management and Climate Change Adaptation ang gipasiugdahan sa Social Action Ministry sa Diyosesis sa Mati pinaagi sa dinapit nga expertong mamumulong gikan sa Manila Observatory ug Ateneo de Manila University (AdMU)nga si Doctor on Atmospheric Science Gemma T. Narisma, inubanan usab ni Professor Julie Dado (AdMU) ug Ms. Milet Mendoza sa Nassa-Caritas Manila.

Kalakip sa mga importanteng hisgutanan nga napasabot ni Narisma mao kung unsa ang sitwasyon ug problema karon sa kinatibuk-ang kalibutan sa natad sa lakat sa panahon, ug kung unsa angay nga pagabuhaton aron maatubang ang maong mahasulong sitwasyon nga miapektar usab sa atong nasud sama sa paghapak sa level 5 -catastrophic Bagyong Pablo sa miaging tuig sa Davao Oriental—ngano susama ni-ato ang gikusgon ug ang gilauman nga damyos sa kalamidad.

Human sa pakigpulong, misunod ang mga pangutana nga gitubag dayon ni Dra. Narisma, unya gi-grupo ang mga partisipante pinasubay sa ilahang parokya, ug gitubag ang mga pangutana kung unsa ang ilahang nasinati nga mga kahuyangan ug kalig-onan (vulnerabilities and strengths) panahon sa kalamidad, ug kung unsa ang ilahang mga plano, istratehiya o sugyot kung adunay lain pang disaster.

Lakip sa mga kahuyang mao ang pag-abuso sa kinaiyahan ug kakulang sa pagtuon, pagpangandam, evacuation centers, ug kahiusahan sa pipila ka mga lider sa gobyerno; sa mga kalig-onan mao ang pagtinabangay ug pagtambayayongay sa simbahan, NGO ug LGU, hugot nga pagtuo sa Diyos ug pagsalig sa usag-usa; samtang mga sugyot sa istratehiya mao ang pag-amping sa kinaiyahan, pagpakabana ug paghatag og seminar- training sa mga GKK kabahin sa mga katalagman, paghimo og nagkadaiyang komitiba pinangunahan o ka-partner sa LGU, hazard mapping, safe evacuation sites, ubp.

Gipahigayon ang kalihokan sa St. Therese Gym, Clergy House Compound, Madang, Mati City, alas 9:00 sa buntag hangtud alas 4:30 sa hapon, ug gitambungan usab kini sa ubang sektor sa katilingban sama sa mga sakop sa academe aron mapa-ambit kini ngadto sa mga kabataan; samtang gi-broadcast kini live sa Catolikong radyo ug telebisyon alang niadtong dili makatambong o tua sa layong mga dapit.

Sa ngalan ni Bishop Patricio H. Alo ug sa tibuok diyosesis sa Mati, si Fr. Dan Fuentes, diocesan social action director, maoy mipasalamat sa tanan nga nahimong kabahin sa kalihokan: gitunol usab niya ang tokens ngadto sa mga guests, ug nagkadaiyang mgacertificates ngadto sa tanan.