Kahimtang sa GKK sa San Pedro Vicariate gisusi

Kasamtangang ang kahimtang sa kinabuhi sa pagtoo, pagserbisyo ug komunidad–kini ang gisusi sa tibuok vicariate sa San Pedro sa gipahigayong BEC vicariate gathering, Setyembre 14.
Ang San Pedro Vicariate gilangkoban sa mga parokya sa San Pedro Cathedral, Our Mother of Perpetual Help, Our Lady of the Assumption, St. Jude Thaddeus, St. Mary of the Perpetual Rosary ug Our Lady of Miraculous Medal ug San Alfonso.
Sa nagkalain-laing realidad sa tagsa-tagsa ka GKK sa nagkalain-laing parokya sa vicariate, gi-susi kung unsa ang mga kinaiya sa mga miyembro nga nakapalambo sa ilang komunidad ug kung unsa ang mga bag-ong kamatuoran nga nakahatag og hagit sa ilang komunidad.
Gitan-aw usab ang mga pamaagi sa pagsaulog sa mga kalihukan sa GKK sama sa Misa ug kasaulogan sa pulong diin adunay nakita na mga panginahanglan aron mapalambo ang ilang pamaagi sa pagsaulog ug makapalambo sa ilang pagtoong Katoliko.
Kauban ang ilang mga kura paroko, gihimo usab sa tagsa-tagsa ka mga parokya ang pagpamalandong ug pag-inambitay mahitungod sa mga rekomendasyon aron mapalambo ang ilang pagpuyo sa pagtoo diha sa GKK.
Ang Auxiliary Bishop sa Dabaw George B. Rimando naghatag og pagpaambit mahitungod sa simbahanong pundasyon sa GKK ug iya usab gihagit ang mga lideres nga molihok alang sa kalamboan sa ilang komunidad.
Si Archbishop Romulo G. Valles nakig-uban sa mga lideres samtang ginapahigayon ang pagsusi sa kahimtang sa GKK sa San Pedro Vicariate. (John Frances Fuentes/@dcherald)