Immaculate Conception Vicariate BEC gathering gipahigayon

“Ang GKK kabahin sa parokya. Ang parokya kabahin sa simbhan. Ang pagtoo mao ang unod sa atong kinabuhi”, mao kini ang mga pulong nga gibungat ni Arsobispo Romulo Valles, D.D nga nakaikag ug maayo sa mga partisipante sa gipahigayon nga BEC data validation sa Immaculate Conception Vicariate niadtong Setyembre 22 sa seminar house sa parokya sa Birhen Dolorosa, Babak.
Ang maong panagtigum giapilan sa 36 ka lideres sa tibuok vicariate. Nagagikan sila sa parokya sa Sto. Niño, kaputian, Immaculate Conception, Samal ug sa Birhen Dolorosa, Babak.
Ang katuyuan sa maong panagtigum mao ang pagtuki sa mga panghitabo diha sa Gagmay’ng Kristohanong Katilingban sa parokya. Ug isip mga lideres unsay ilang ikatampo aron mapahapsay ug labaw ng molambo ang hugot nga pagtoo sa matag miyembro sa GKK.
Sumala ni Fr. Ritsche Gamaya, DCD. “It’s a new way. New in the sense of renewed emphasis on church as community which entails a participatory approach to church’s leadership (PCP II)”. Diha sa GKK makita ang simbahan nga nagbag-o diha sa pagtoo. Ang simbahang may pagtulun-an, pagkamaampoon, pagkamapaambiton, malipayon ug nagkahiusa nga katilingban nga maoy tinubdan sa pagtoo isip mga Kristiyano.
Sa laing bahin nalipay kayo ug dako si Arsobispo Valles sa iyang nakita nga ang lideres sa vicariate nagkahiusa ug andam nga mohatag sa ilang panahon alang sa kalihokan sa parokya. Nanghinaot si Arsobispo Valles nga mapahimutang ang programa sa maag GKK ug mapatigbabaw ang pagtoo sa matag-usa.
Gihan-ay ni Fr. Bong Dublan, DCD Assistant Pastoral Director ang kinatibuk-ang datos sa Immaculate Conception Vicariate aron matubag ang panginahanglan sa matag parokya uban sa GKK.
Sa katapusan, gipadayag ni Fr. Pete Lamata, DCD ang Archdiocesan GKK Coordinator ang pagpasalamat kay Msgr. Nelson Lucas ang kura paroko sa parokya sa Birhen Dolorosa sa makanunayong pagsuporta sa kalihokan alang sa kalambuan sa pagtoong Katoliko.