Dominggo sa Misyon sa tibuok kalibutan

Karong domingoha, Octobre 20, gisaulog sa tibuok Simbahan ang tinuig nga Dominggo sa Misyon. Adlaw diin ginapasalamatan nato ang Ginoo sa gasa sa Pagtoo kang Kristo uban sa Simbahan ug ginabag-o nato ang pagdawat sa Iyang mando nga saksihan siya sa tanang katawhan ug kanasuran, ug kaliwatan. Ginaangkon usab nato nga ang matag usa kanato nga sakop sa Simbahan, mga Misyonero ni Kristo – mga layko, mga relihiyoso, ug ang mga pari. Hiniusa ug tinagsa nga nagapaambit ngadto sa uban sa atong kasinatian uban kang Kristo Hesus, pinaagi sa pulong ug buhat.

Si Papa Francisco nagpahinumdum nga ang gasa sa pagtoo nga atong gisaulog karong Tuig sa Pagtoo, gasa nga kinahanglan usab nga ipaambit ug saksihan ngadto sa ubang mga tawo, ilabi na sa daghan pa kaayo nga wala makadungog ug makaila sa Maayong Balita sa kaluwasan nga mao si Kristo, ug kanila nga namiya na o nangaluya na sa pagtoo kang Kristo. Busa, kinahanglan pa gayud nga palawomon pa gayud ang atong personal nga kasinatian uban ni Kristo, diha ug pinaagi sa Simbahan, aron magmaisgon apan matinahuron, ug malipayon kitang mopahayag ug motanyag sa kalibutan sa atong gitoohan. Kinahanglan ang pag-ampo, pagsalikway sa sala, pagbag-o sa kinabuhi tungod kang Kristo, pinaagi kaniya ug diha kaniya.
Magmanggihatagon unta kita sa pakiglambigit sa Misyon sa Simbahan karong Dominggo. Mopaambit kita sa atong panahon, talento, ug bahandi alang sa pagpadayon sa pagsangayaw sa Maayong Balita sa tanang kanasuran ug katawhan. Ilakip nato sa atong pagrosaryo matag adlaw karon ang Misyon – Rosaryo alang sa Misyon sa tibuok kalibutan.

Ang Adlaw ni Maria

Didto sa Santuario sa Fatima, ang mahal natong inahan nga si Birheng Maria mipaila sa iyang kaugalingon nga siya ang Rayna sa Santo Rosaryo. Sulod sa unom ka higayon sa ilang panagtagbo, gibalikbalik niyang gihangyo sa 3 ka mga bata, nga mao si Lucia, Jacinta ug Francisco, nga magampo sila sa santo rosaryo alang sa kalinaw ug paghunong sa gubat. Uban sa pag-ampo, gipangayo usab sa mahal nga Birhen ang ilang pagpenitensya alang sa kapasayloan ug kaluwasan sa mga sala ug sa mga makasasala. Gipangayo usab niya nga ilang itugyan ngadto sa iyang putling kasingkasing ang ilang tibuok kinabuhi.
Sa kasaulogan sa Adalaw ni Maria niining Tuig sa Pagtoo didto sa Roma, nga atol sa piyesta sa Birhen sa Fatima, gihangyo ni Santo Papa Francisco nga dalhon ang original nga imagen sa Birhen sa Fatima didto sa Batikano, ug sa atubangan sa maong imahen, itugyan sa Santo Papa ang tibuok kalibutan ngadto kaniya ug pinaagi kaniya ngadto sa Dios atong Amahan.

Mapasalamaton ako uban sa pipila ka mga kauban gikan sa Pilipinas nga miadto didto sa Roma aron mosalmot sa maong talagsaon ug halandumong kasaulogan niadtong Oktobre 12-13 duyog sa libolibo ka mga magtotoo nga miapil usab, lakip na ang milyon milyon ka mga katoliko usab sa ilang tagsatagsa ka nasud. Niadtong tungora, natagaan ako’g higayon nga makasaulog sa Bihilya ug sa Misa uban sa Santo Papa.
Gitahasan sa Catholic Bishops Conference of the Philippines ang adhoc executive committee sa National Consecration nga dalhon ug igasa sa Santo Papa, niining higayon, ang Imahen sa Puso ni Maria, Ina ng Bayang Sumisinta isip timaan sa walay hunong nga pagmahal ug pakighiusa sa Simbahang Katoliko dinhi sa Pilipinas ngadto kang Santo Papa Francisco, ug handuman usab sa atong nasudnong pagtuggyan ngadto sa Putling Kasingkasing ni Maria niadtong Hunyo 8, 2013. Nahimo kini namo niadtong Wednesday General Audience niadtong Oktobre 9, 2013.

Ang miapil sa grupo nga miadto sa maong okasyon mao ang nagrepresentar sa adhoc committee nga si Fr. Yulito Ignacio, Ms. Victoria Borres. Gikan sa Marian Solidarity nga sila si Amb. Merceditas Tuazon, Ms. Josefina Bantug, Ms. Carmela Borres. Miadto usab ang grupo sa Confraternity of Mary Mediatrix of all Grace nga gipangulohan mismo sa founder ug spiritual director nga si Fr. Melvin Castro.
Salamat kaayo mahal nga Birhen sa Fatima nga mitawag kanato nga mopahayag kaniya sa atong pagmahal ug kang Santo Papa Francisco kinsa nagapahinumdum kanato nga ang tawag sa Birhen sa Fatima wala pa matapos ug angay nga balikan ug tubagon ug tumanon alang sa kalinaw ug kalingkawasan sa tibuok kalibutan gikan sa katalagman tungod sa SALA. VIVA BIRHEN SA FATIMA!