“Diamond Jubilee” sa mga madre sa Daughters of St. Paul

“Ang tawo magplano apan ang Diyos ang mopahigayon!” Mao kana ang nahitabo sa pag-abot sa mga madre sa Daughters of St. Paul dinhi sa Pilipinas. Ang Pilipinas dili mao ang distinasyon sa mga madre, sa ilang pag-abot gikan sa Italia padulong sa Asia niadtong Abril, tuig 1937; kondili ang China. Apan tungod sa Ikaduhang Kalibutanong Gubat nga giapilan sa nasud sa Hapon ug sa kalibutan, gidala sila dinhi sa Pilipinas niadtong 1938, diin dili unta sila buot manimuyo tungod kay Katoliko na ang nasud.
Sukad niadto ang mga madre sa Daughters of St. Paul misugod sa ilang misyon sa pagpaambit sa Pulong sa Diyos ug sa mga Gipanudlo sa Simbahan pinaagi sa medya sa Sosyal nga Komunikasyon. Mikaylap sila sa tibuok Pilipinas diin sila adunay 19 na ka komunidad. Sa mga balay, sa mga eskwelahan, mga opisina, mga palingke, factoria, campo sa mga militar ug uban pa, ang ilang nabisita aron ilang isabwag ang Pulong sa Diyos. Alang niadtong mga tawong dili nila personal nga mahimamat , nag-abli sila sa “Paulines Media Center”, diin makabasa ang katawhan sa Bibliya ug mga pagtulun-ang Kristohanon. Alang niadtong dili maabot sa ilang mga pagbisita sa katawhan, nag-mugna sila ug mga programa sa radio. Alang niadtong dili buot mobasa, naghalad sila sa mga espirituhanong awit ug musika diha sa CD ug pelikula sa mga istorya sa Balaang tawo sa Bibliya ug mga Santos pinaagi sa DVD. Alang niadtong buot mkasabot kon unsa ang mga epecto ug makatabang diha sa paggamit sa mga bag-ong himan sa komunikasyon, naghalad usab sila ug “Media Literacy Education” Seminars o Recollections. Ang tanan alang ug tungod sa “Himaya sa Diyos ug Kalinaw sa Katawhan dinhi sa kalibutan” matud pa sa ilang Fondador nga si Beato James Alberione. Sa pagkakaron, agig sunod sa panahon sa “digital” o makabag-ong teknolohiya sa komunikasyon, sila migamit na sa Television ug sa Internet aron dalhon ang Diyos sa katawhan ug ang katawhan ngadto sa Diyos.
“Diyamanteng Anibersaryo” sa Gugma ug Pagpangalagad! Karong Octobre 13, saulogon ang ika-75th ka tuig diin hatagan ug pagpalawom ang tema: Pagkamakanunayon sa Diyos, Pagsusi- sa mga Grasyang Nadawat, Pagpasalamat ug ang Pag-ugmad sa Apostolikanhong Serbisyo.
Tungod niini usa ka proyekto ang gisugdan niadtong tuig 2011: “Share a Free Bible to the Poor” ug ipadayon hangtud 2014. Dinhi sa Davao, nasugdan na ang pagpanghatag sa Bibliya nga Binisaya sa mga lugar diin naagian sa bagyong Pablo, sama sa Cateel, Bagganga, Boston ug mga luna sa Davao del Norte, Davao del Sur, siyudad sa Davao, Cotabato, Surigao ug mga luna nga nahisakop sa Komunidad sa mga madreng Daughters of St. Paul nga ania dinhi. Kining pagpanghatag sa “Free Bibliya sa mga Kabus” inubanan sa usa ka adlaw’ng seminar mahitungod sa Bibliya, diin mosaad ang matag nakadawat sa maong libro nga mobasa ug maningkamot gayud sa pagsabwag sa “pulong sa Diyos” ngadto sa uban, ilabi na sulod sa Gagmay’ng Kristohanong Katilingban.
(Note : you may cut this article up to this part, if there is no more space in the paper)
Sa parokya sa Mandog nianang adlawa, pagahimoon na usab ang pagpanghatag sa “Free Bible to the Poor” inubanan sa paghatag sa mga lima ka oras nga seminar mahitungod sa Bibliya ug katlingbanong pagsaad sa pagbasa-sabwag sa Pulong sa Diyos. Adunay pagsaulog sa Santos nga Misa nianang pagkahapon, nga panguluhan Ni Padre Jorje Angga ang pari sa Parokya sa Mandog ug imbitado ang mga sakop sa “Pauline Family” nga mao ang mga pari sa Society of St. Paul, mga madre sa Pious Disciples of the Divine Masters, Sisters of the Good Shepherd, Our Lady of the Annunciation Institute, Pauline Cooperators ug ang Friends of the Divine Master ug mga collaborators sa Daughters of St. Paul.