SLVCC 17 KA TUIG NA NGA NAGAPANAW

Niadtong Sabado, Septiyembre 14, 2013, atol sa kapistahan sa Pagpasidungog sa Santa Krus sa tibook Simbahan, ang San Lorenzo Village Christian Communities (SLVCC), nagsaulog usab sa ilang Ika-17 ka tuig sa pagpanaw ingon nga Kristohanong Katilingban (zonal community with 27 BECs) sa pagpangama ni San Lorenzo Ruiz de Manila sakop sa Parokya sa San Lorenzo Ruiz sa Distrito sa Talomo ubos sa maalagarong pag-amuma sa Kura Paroko niini nga si Rev, Fr. Roger Duhaylungsod kinsa mao mismo ang nangulo sa kasaulogan sa misa atol sa maong kaugdahan. Sa iyang homiliya gidasig ni Fr. Duhaylungsod ang katawhan sa pagdawat ug pagpuyo sa krus ni Kristo taliwala sa mga hagit sa kinabuhi, sama sa gihimo ni San Lorenzo Ruiz, kinsa mitahan sa iyang kinabuhi tungod ug alang kang Kristo kay sayud siya nga anaa lamang kang Kristo ang matuod nga kadaugan. Tungod niini, ang Krus dili timaan sa kapildihan ug kamatayon apan sa kadaugan ug kinabuhi. Kay dinhi gipahayag sa Dios ang Iyang dakung gugma kanato nga Iyang katawhan.

Sulod usab sa kasaulogan sa misa, walo ka mga bata ang midawat sa bag-ong kinabuhi ingon nga Kristohanon ug nahimong bag-ong sakop sa Kristohanong Katilingban diha Sakramento sa bunyag tungod sa pagtoo nga gikuptan sa ilang mga ginikanan ug sinuportahan sa ilang mga ninong ug ninang. Pipila usab ka mga panimalay ang gipanalanginan sa pag-abag ni Fr. Randy Suello, S.Ch.P.

Ug sama sa naandan, gipahigayon ang timaan sa panag-igsoonay pinaagi sa usa ka salo-salo alirong sa talad kan-anan agi’g pagpasalamat sa tuig nga milabay ug panghinaut alang sa tuig nga umaabot dinasig sa tema: “Uban ni San Lorenzo Ruiz magmadaugon kita diha sa krus ni Kristo. (jbdr 092213)