PSK Septyembre 2013

“Kinahanglan nga matuod gayod ang atong gugma ug dili sa pulong lamang; ipakita ta kini sa mga maayong buhat” (1 Jn 3:18).
Si San Juan ang nagsulat niini. Gipasidan-an niya ang iyang katilingban bahin sa mga tawong nagpasidungog sa ilang pagtoo kang Jesus kutob sa pulong lamang ug wala sa mga buhat. Giisip niining mga tawhana nga ang mga buhat walay pulos o pakapin lamang sama nga ang tanan nabuhat na ni Jesus. Wala’y bunga ug gapundo lang ang ilang pagtoo kay gipadaplin niini ang mga buhat ni Jesus nga mao ang dili mailisan nga bahin nga Iyang gipangayo sa matag usa ka tawo.
“Kinahanglan nga matuod gayod ang atong gugma ug dili sa pulong lamang; ipakita ta kini sa mga maayong buhat.”
Ipatinuod ang gugma diha sa mga buhat. Matud pa sa Apostol, ang tinuod nga pagtoo, mailhan diha sa paghigugma sama sa gibuhat ug gitudlo ni Jesus; ug ang unang timailhan niining gugmaha mao ang konkretong mga buhat. Ang gugma ni Jesus wala gipatinuod pinaagi sa mga maanindot nga pakigpulong. Diha siya sa atong taliwala ug nagbuhat ug mga maayong buhat: gi-ayo niya ang tanan, andam siyang moatubang sa tanang midangop kaniya, gikan sa mga pinaka-mahuyang, mga kabus, mga sinalikway; ug gitugyan niya ang kinabuhi alang kanatong tanan.
“Kinahanglan nga matuod gayod ang atong gugma ug dili sa pulong lamang; ipakita ta kini sa mga maayong buhat.”
Midugang pag-ingon ang Apostol nga mohigugma ta dili lamang pinaagi sa mga buhat, kondili subay sa kamatuoran. Samtang ang Kristohanong gugma naninguha nga i-hubad ngadto sa buhat; ang tuburan sa iyang kadasig mao ang kamatuoran sa gugma nga atong makaplagan diha ni Jesus; manlimbasog ta sa paghimog mga buhat nga nahi-uyon o nahi-usa sa iyang mga pagbati ug pagtulon-an. Nan, kinahanglan ta mohigugma subay ug pinasukod sa gugma nga gipadayag ni Jesus kanato.
“Kinahanglan nga matuod gayod ang atong gugma ug dili sa pulong lamang; ipakita ta kini sa mga maayong buhat.”
Unsaon man nato pagpuyo sa Pulong sa Kinabuhi ning bulana ? Tataw kaayo ang mensahe. Gitawag ta niya sa tiunay nga kinabuhing Kristohanon, nga gibalik-balik ug sulti ni Jesus. Apan dili ba kini ang dugay nang gipaabot sa kalibotan? Dili ba tinuod nga ang kalibotan karon buot makakita ug katawhan nga nagsaksi sa gugma ni Jesus?
Nan, mohigugma ta pinaagi sa mga buhat ug dili sa pulong lamang, sugod sa mga yanong adlaw adlawng buluhaton nga gipangayo sa mga tawo nga anaa ra sa atong paligid.
Ug mohigugma usab ta diha sa kamatuoran. Gipasunod kanunay ni Jesus ang iyang mga lihok diha sa kabubut-on sa Amahan; ingon usab unta kita niini sa atong mga lihok nga angay mosubay sa mga pulong ni Jesus. Buot niya nga mailhan nato Siya nga nagpaluyo diha sa atong isigkatawo. Sa tinuoray, unsa may atong gibuhat sa isigkatawo, iyang gi-isip nga gibuhat nato Kaniya. Ug unya buot Niya nga higugmaon nato ang matag tawo sama sa paghigugma nato sa atong kaugalingon; ug nga maghinigugmaay kita andam sa pagtugyan sa atong kinabuhi alang sa usa’g-usa.
Ingon unta ani ang atong paghigugma aron mamahimo kitang mga instrumento ni Jesus alang sa kaluwasan sa kalibotan.(Chiara Lubich)