Pag-ampo alang sa kalinaw gipanawagan sa mga relihiyosong pundok

Sa kahilom sa udtong tutok, nagtapok ang mga relihiyosong pundok sa gawas sa simbahan sa Our Mother of Perpetual Help Parish aron mag-dagkot og kandila ug maghalad og pag-ampo alang sa mga biktima sa gubat sama sa nahitabo sa Syria.

Ang mga religious congregations, mga protestante ug mga civic organizations, nagpahigayon og prayer vigil niadtong Setyembre 7 isip tubag sa panawagan ni Pope Francis nga mag-ampo ug magpuasa alang sa kalinaw sa tibuok kalibutan ilabi na sa Syria diin pipila ang namatay sa gituohang chemical attack.

Nagpa-lupad usab sila sa mga lobo diin asa nila gisulat ang ilang mga pag-ampo. Mi-pirma usab sila sa usa ka tarpaulin isip panawagan nila nga mahunong ang mga kagubot nga maoy hinungdan sa kamatayon sa mga inosente.

Gawas sa mga relihiyosong pundok, mitubag usab ang mga parokya sa panawagan sa Santo Papa. Si Archbishop Romulo G. Valles nagpagawas og circular nga nanawagan usab sa mga katawhan sa tibuok Archdiocese of Davao nga motubag sa tawag sa Santo Papa aron mag-ampo ug magpuasa.

Ang St. Francis Xavier College Seminary naghimo usab og vigil aron sa pag-ampo ug pagpuasa alang sa Syria.

Sa iyang homiliya usa ka adlaw human gipahitabo ang pag-ampo, si Fr. Allan Rodriguez, dean of seminarians nag-ingon nga bisan layo sa Pilipinas ang nasud nga Syria, napakita gihapon ang kahiusahan isip usa ka Simbahan pinaagi sa pagtubag sa tawag ni Pope Francis.

Giingon usab niya nga angay pangayuon ang panabang ni Birhen Maria sa panawagan sa kalinaw sa tibuok nasud ug kalibutan.