Mga magtiayon nagtuon sa Natural Family Planning

Aron mapahibalo ang kaanindot sa pag-himo sa Natural Family Planning alang sa mga magtiayon nga magsugod ug magpadagan sa pamilya, gihimo sa Family and Life Apostolate ang NFP Seminar, Setyembre 7.
Napulo ka mga magtiayon ug 11 ka mga minyo nga indibidwal ang nagkat-on ug naminaw mahitungod sa NFP nga maoy gitugot sa Simbahang Katoliko isip pamaagi sa pagpili sa pagpili sa kadaghanon sa mga anak.
Gihatagan og pagtagad sa maong seminar ang Billings Ovulation Method nga inila nga epektibo nga natural family planning method.
Gitun-an usab sa mga magtiayon ang paagi sa pag-charting aron mahibaw-an kung kanus-a fertile ang asawa aron magkasinabot ang magtiayon sa ilang panginahanglan isip mag-asawa.
Ang Director sa FLA nga si Fr. Orlando Angelia naghatag og pagpasabot mahitungod sa Theology of the human body aron mas masabtan sa mga magtiayon kung unsa kabalaan ang lawas sa tawo ug aron mahibaw-an nila ang moralidad sa pagkinabuhing magtiayon.
Sumala ni Fr. Angelia, kinahanglan adunay pagsinabtanay ang mga magtiayon sa ilang panginahanglan.
Dugang usab niya nga ang Natural Family Planning dili usa ka paagi sa pag-kontrol sa pag-daghan sa populasyon kon dili usa ka pamaagi sa paghibalo sa kagustohan sa Ginoo sa ilang kinabuhi isip mag-asawa.
“Natural Family Planning is openness to life,” giingon ni Fr. Angelia.
Sumala ni Fr. Angelia, tuyo sa maong seminar nga maka-kuha ug mga dugang trainors nga mga magtiayon nga maoy magtudlo sa ubang mga magtiayon sa ilang mga tagsa-tagsa ka mga parokya.
Ang mga magtiayon kinahanglan tun-an ang mga pamaagi sa Natural Family Planning sulod sa unom ka bulan. Himoon usab ang regular na follow-up didto sa Natural Family Planning Center, Fatima St. Corner Jacinto St. Davao City, aron makita ang ilang paglambo sa ilang pagtuon.
Ang seminar nga gihimo sa NFP Center mao ang ika-tulong higayon nga gihimo sa FLA. Ang unang seminar napahigayon niadtong Mayo 25-26 ug ang ikaduhang batch gihimo niadtong Hulyo 20-21.