Knights of Columbus sa Barangay Lasang

Mibarog ang pundok sa Knights of Columbus o K of C sa Brgy. Lasang, Dabaw, (27 kilometros gikan sa sentro sa Dabaw paingon Davao del Norte) agi’g pagmugna sa St. John the Baptist Council 15602 niadtong Nobyembre 11, 2012.
Ang maong Charter Council adunay 30 ka miyembro gikan sa nagkalain-laing parokya sa Archdiocese of Davao ug Diocese of Tagum. 19 nila nahisakop sa parokya sa Lasang nga gipangulohan ni Bro. Rogelio P. Andama, Jr. ug gitugyan nga mahimong Grand Knight sa maong charter council.
Gihatagan og pagtugot ug suporta ang maong hugpong sa kasamtangang kura paroko sa Lasang, Fr. Arnulfo Cubero ug sa iyang parochial vicar, Fr. Florencio Acedo, Jr.
Ang maong grupo sa Simbahang Katoliko maoy giila nga World’s Biggest Lay Catholic Family Service Organization. Adunay kapin 1.8M nga mga miyembro sa 14 ka nasud sa kalibutan: United States of America, Canada, Mexico, Philippines, Panama, Guatemala, Puerto Rico, Dominican Republic, The Bahamas, Cuba, Virgin Islands, Guam, Saipan ug Poland. Ug adunay duha ka nasud sa kanhi Russia, miapil sa K of C karong tuiga 2013. Ang kadaghanon sa miyembro diri sa Pilipinas mikabat na sa kapin 300,000 kabuok (86,000 ani sa Mindanao, 12,000 kapin anaa sa Davao).
Mapasalamaton ang mga parokyano sa Lasang ug ang mga charter members sa Council 15602 sa mga tabang nadawat aron mapahiluna ang K of C didtong dapita nila Regional Deputy Sir Knight Gerry T. Mission (Davao Region), Provincial Deputy Sir Knight Jacinto Pancha (Davao North Province), District Deputy Sir Knight Orlando D. Bravo (District 13), Grand/Sir Knight Francisco S. Maglinte, Jr. (Camp Panacan Council 15108) ug Financial Secretary Sir Knight Santiago A. Vidal (St. Francis Xavier Council 8777).
Ang Apostle of the Young and Protector of Christian Family Life ug Halangdong Sulugoon sa Diyos, Father Michael McGivney, usa ka simpleng kura paroko sa New Haven, Connecticut, USA ang nangulo sa unang K of C Council, Ang San Salvador Council 1, isip Council Chaplain niadtong tuig 1882, diri sa Pilipinas gipahimutang ang Manila Council 1000 niadtong tuig 1905, ug ang Davao Council 3289 niadtong tuig 1950 gipahigayon.
Mga inilang K of C nga miyembrong Pilipino karong panahona: Cardinal Luis Antonio G. Tagle, Arsobispo sa Manila, 3rd degree Member of Mother of God Council 15427, Imus, Cavite ug Sir Knight Hilario Davide, Jr., nga kanhi Chief Justice sa Supreme Court, St. Michael Council 6054. Viva Jesus!

Ni Butch Andama