Indangan Parish nagsusi sa kasinatian sa GKK

Sa pipila ka mga parokya nga nasuroy sa GKK Director sa Archdiocese of Davao nga si Fr. Pete Lamata, ang parokya sa Our Lady of Miraculous Medal sa Indangan ang nakita niya nga adunay tarpaulin nga nagtimbaya sa mga delegado ug napulo ka laptop nga dungan gigamit aron i-encode ang datos nga nakuha sa mga miyembro sa ilang pag-storya mahitungod sa kasamtangang higayon sa ilahang GKK.
Dakong kalipay ug pasalamat ang gibati sa matag miyembro nga mitambong sa BEC Data validation sa maong parokya, Agosto 25.
Sa maong data validation, usa sa mga gikabalak-an sa mga miyembro mao ang pagbalhin sa ilang mga kauban sa laing sekta apan sumala ni Fr. Lamata, nga kanhing kura paroko sa St. Mary’s Parish sa Buhangin, dili kini angay kabalak-an ug mamahimo pa kining hagit sa mga miyembro nga magpabiling maayong Katoliko nga lig-on sa pagtoo.
Giingon usab ni Fr. Lamata nga kinahanglan maayo ang relasyon sa matag miyembro sa GKK kay dili mulambo ang komunidad diha sa pagtoo, pag-ampo ug pag-alagad kung walay maayong pakig-relasyon o pakiglambigit sa katawhan.
Bisan pa sa kainit sa panahon, mainiton gihapon nga nagpadayag ang mga miyembro sa GKK kauban ang ilang kura paroko nga si Fr. Elneri Menez sa ilang mga kasinatian sa ilang GKK ilabi na sa ilang pakiglambigit sa ilang mga lideres.
Gi-awhag usab ang mga miyembro gikan sa mga batan-on ug mga hamtong nga i-develop ang ilang kinatibuk-ang panglantaw sa GKK aron usab maanaa kanila ang gugma alang sa ilang GKK.
Giingon ni Fr. Lamata nga kung mulambo ang pagtoo sa mga miyembro mulambo usab ang ilang GKK. (John Frances Fuentes/@dcherald)