Ikakawhaa’g Unom nga Domingo “sulod sa tuig”

Am 6:1. 4-7/Ps 146:7. 8-9. 9-10/
1Tm 6:11-16/ Lk 16:19-31

Mga igsoon ko diha kang Kristo, pagkanindot sa atong Ebanghelyo karong adlawa tungod kay naghatag kining giya alang kanato aron makalikay kita sa Emperno ug makasulod kita sa Gingharian sa Dios.

Pangutana: Unsay angay tang buhaton sumala sa atong Ebanghelyo?

Una: Pagtabang sa mga nanginahanglan. Nahasiguro ko nga kasagaran kanato mitabang o andam motabang. Apan ang pangutana: Kinsay atong gitabangan? Ang datu sa atong Ebanghelyo siguro mitabang sa iyang lima ka igsoong lalaki, gani gusto siyang motabang kanila sa iyang paghangyo kang Abraham nga ipadala si Lazaro aron pagpahimangno kanila. Ang kulang kay kutob ra sa iyang mga igsoon, diha ra kutob sa pamilya. Wala na makagawas sa pamilya, mao nga wala makaabot kang Lazaro nga naghigda gawas sa pultahan sa iyang balay. Ang atong tabangan kadtong tinuod nga nanginahanglan ug ang angay tabangan, dili lang kadtong atong mga suod lang. Mao kini nga mga igsoon magtan-aw tan-aw kita sa atong palibot kung kinsa kadtong nanginahanglan sa atong panabang. Sa atong pagtabang kanila mitabang usab kita sa atong kaugalingon, ug sa dili nato pagtabang kanila, kita usab wala mitabang sa atong kaugalingon.

Ikaduha: Paghatag og importansya ug dakong bili sa Pulong sa Dios o sa Bibliya. Ang Pulong sa Dios/Bibliya maghatag kanato’g insaktong giya padulong sa Gingharian sa Dios. Ang datu mihangyo kang Abraham nga paadtoon si Lazaro sa iyang lima ka igsoong lalaki aron pagpahimatngon kanila aron dili sila mahitumpawak sa Emperno. Apan si Abraham mitubag: “Toa si Moises ug ang mga propeta. Papamatia sila kanila.” Si Moises ug ang mga propeta ang naglangkob sa Bibliya sa mga Judeo ang gitawag og “Hebrew Bible”. Sa ato pa sa pag-ingon ni Abraham, “Toa si Moises ug mga propeta,” toa nay Bibliya nga angay nilang basahon ug pamation. Kay ang Bibliya mao ang giya aron makasubay kita sa dalan padulong sa Gingharian sa Dios. Matod pa sa usa ka manunulat ang kahulugan sa “BIBLE” – “BASIC INSTRUCTION BEFORE LEAVING EARTH”. Busa mga igsoon dili nato baliwalaon ang Pulong sa Dios o Bibliya. Kinahanglan muhatag kita’g panahon sa pagbasa ug sa pagpamati niini pinaagi sa pag-apil sa kasaulogan sa Pulong sa Kapilya ug pag-apil sa Santos nga Misa sa Parokya. Kini mao ang atong pagpakita nga importante ug bilihon ang Pulong sa Dios alang kanato. Kini ang dalan padulong sa Gingharian sa Dios.

Ni Fr. Johnny Autida/Parish Priest
Virgen de los Remedios Parish