Ika-28 nga kapistahan sa San Lorenzo Parish saulogon

Ang San Lorenzo Ruiz Parish sa Talomo magsaulog sa ilang ika-28 nga kapistahan karon umaabot nga Setyembre 29, uban sa tema nga “San Lorenzo Ruiz: Sumbanan sa Pagtoo.”

Sa pagsaulog sa kapistahan, si Archbishop Romulo G. Valles ang mangulo sa Santos nga Misa sa alas otso sa buntag.

Pipila ka adlaw una saulogon ang adlaw sa kapistahan, adunay nagkalain-laing aktibidades ang gipahigayon sama sa 1st GKK Festival diin nagkatapok ug naglipay-lipay ang tanang sakop sa Gagmay’ng Kristohanong Katilingban. Gikoronahan usab ang Ginang ng San Lorenzo Ruiz 2013 nga si Mrs. Gina Orehuela. Nagpahigayon usab og libreng medical ug dental check-up.

Sa pagsugod sa nobena, adunay programa matag gabii aron magpasundayag sa mga talent gikan sa nagkalain-laing ministriya ug organisasyon, mga GKK leaders, mga barangay officials, ug mga eskwelahan nga sakop sa parokya. Aduna usab pa-contest sama sa Mutya ng San Lorenzo Ruiz, Kalookalike ug SLRP Got Talent.

Uban sa kasadya ning talagsaong gasa sa pagtoo, nagpasalamat ang tanang parokyano sa mga kabaskog ug lamdag nga espirituhanon nga naghimo kanilang matoohon ug matinud-anon sa Ginoo sulod sa daghang katuigan.

Mapasalmaton usab ang Kura Paroko, Fr. Roger Duhaylungsod sa tanang mga misuporta ug mihatag sa ilang panahon, talent ug mga grasya nga nahimong hinungdan nga malampuson ang pagsaulog sa ika-28 nga kapistahan sa parokya isip pasidungog sa ilang patron nga si San Lorenzo Ruiz. (@dcherald)

By Jo Ann Padillo/Parish correspondent