‘Ginikanang matuohon, kalig-on sa bokasyon’

Sa pagsaulog sa Tuig sa Pagtoo karong tuiga, sakto nga napili sa mga formators ug mga seminarians sa St. Francis Xavier College Seminary ang tema sa ilang tinuig nga Parents’ Day nga: “Ginikanang matuoon, kalig-on sa bokasyon.”
Solemni ug malipayon nga gisaulog sa tibuok komunidad sa college seminary ang adlaw’ng gigahin isip pahinungod sa mga ginikanan sa mga seminarista niadtong Setyembre 8, adlaw’ng natawhan ni Birhen Maria.
“Unsaon nato nga ang atong pagtoo mulambo?” kini ang gipangutana sa Dean of Seminarians nga si Fr. Allan Rodriguez sa iyang homiliya atol sa misa nga gipangulohan sa rector nga si Fr. Maximo Bahinting sa pagsugod sa tibuok adlaw nga kasaulogan.
“Usa kini ka hagit. Unsaon nato pagpadayon sa pagpadayag ug unsaon nato mapalig-on sa pormasyon ang mga seminarista?” dugang ni Fr. Rodriguez.
Giingon usab niya nga ang rason nga mapalig-on ang bokasyon mao ang pagdangop sa Diyos ug ang makatabang sa mga seminarista sa pagpamalandong sa kabubut-on sa Dios mao ang Iyang inahan nga si Birhen Maria.
Dugang niya nga sa tibuok kinabuhi ni Birhen Maria, iyang gipamalandongan pag-ayo ang kabubut-on sa Dios nganha kaniya.
Sulod sa tibuok adlaw nga pakg-uban sa mga seminarista sa ilang ginikanan, gihimo ang pag-inambitay sa mga kasinatian kung diin nalig-on ang ilang pagtoo.
Ug isip paghatag og pahalpay sa mga ginikanan, nagpasundayag og programa diin gipakita ang mga talento sa mga seminarista ngadto sa ilang mga ginikanan.
Ang maong pagsaulog sa Parnts’ Day gihimo alang sa mga second year ug third year nga mga seminarista. Himoon ang Parents’ Day alang sa mga first year ug fourth year sa Setyembre 22.