DeLiKaDu

Ika-kawhaa’g lima nga Domingo sa Ordinaryong Panahon
Am. 8:4-7/ 1 Tim. 2:1-8/ Lk. 16:1-13

Kung ikaw gipiyalan sa pork barel, unya nasakpan ka nga wala nimu gamita ang pondo sa maayong paagi unsay imong buhaton? Sama sa piniyalan dinhi sa Ebanghelyo, ikaw namiligro kay pakyas ang pagsalig nga gisangon kanimo sa imong agalon. Busa tabangi ang imong kaugalingon aron mahimong DeLiKaDo.

DEterminasyon ang gikinahanglan aron dili ka mapukan sa kaguol ug kabalaka nga tingali unya og tanggalan ka sa posisyon. Ayaw kahadlok sa wala pa moabot kondili positibo ka unta nga mobarug aron ikaw molahutay. Matag suliran dunay solusyon. Dili ka unta mapunta sa Desmaya.

LIhok ang sulbad ug dili katapul. Kung magpadala ka sa kahadlok dili gayod ikaw molambo ug moirog. Buhata ang maayo aron ikaw magpadayon. Kab-ota ang imong mga damgo uban sa kakugi ug buhat nga tininuod. Matag plano magpabiling plano hangtod walay lihok. Sama sa unang pagbasa dili unta ikaw matintal sa Limbong.

KAabtik ang makatabang aron ang lihok mahimo. Dili maayo nga human ka mapukan ikaw dili makakat-on. Kung dunay oportunidad sa pagbangon angay kana nga pahitabuon. Hupti ang kaigmat uban sa kusog ug maayong panghuna-huna aron imong mahimo ang dapat ug sakto. Wala kay padungan kung magpabilin ka sa Kaluya.

DUngog ang gihatag kanimo sa Dios sukad ka natawo. Bisan unsa ang imong kahuyang ug kapakyasan dili kini makamenos sa gasa sa imong pagkatawo. Magpabilin ka nga minahal ug importante atubangan sa Dios. Sama sa ikaduhang pagbasa, imo lamang paningkamutan ang husay nga kinabuhi ug subay sa maayong pamatasan. Dili unta moabot sa imong huna-huna nga ikaw napukan, walay bili ug Dugmok.

Kitang tanan mga piniyalan sa Dios. Kung ang kalibotanon nga mga diskarte kinghanglan ug determinasyon, lihok, kaabtik ug dungog kinahanglan usab nato kini aron molambo ang atong relasyon sa Ginoo, aron molig-on ang atong pagtuo, aron mo-asenso ang atong espirituhanong kinabuhi. Dili unta kita molantaw sa atong kaugalingon nga puno sa desmaya, limbong, kaluya ug dugmok nga pagkatawo. Unsa ka ba klase nga piniyalan?