(Cf. Kompendiyo sa Katekismo sa Simbahang Katoliko, 107-109)

P: Kinsa man ang gidapit ngadto sa Gingharian sa Dios nga gisangyaw ug gipahigayon ni Jesus?
T: Ang tanan gidapit ni Jesùs sa pagsulod sa Gingharian sa Dios. Bisan gani ang labing daotan sa mga makasasala gitawag aron makabig ug madawat ang walay-utlanan nga kaluoy sa Amahan. Dinhi na daan sa yuta, ang Gingharian ialaha sa mga modawat niini nga may mapaubsanon nga kasingkasing. Kanila, gipadayag ang mga misteryo sa Gingharian.

P: Nganong gipahayag ni Jesus ang Gingharian pinaagi sa mga timaan ug mga milagro?
T: Gipaubanan ni Jesus ang iyang mga pulong og mga timaan ug mga milagro aron pagsaksi nga ang Gingharian anaa dinha kaniya, ang Mesiyas. Bisan og gi-ayo niya ang pipila sa mga tawo, wala siya mi-anhi sa pagwagtang sa tanang mga kadaotan dinhi sa yuta, hinuno-a, aron pagluwas kanato ilabina sa kaulipnan sa sala. Ang pagpalagpot sa mga yawa nagmantala nga ang iyang krus magmadaogon batok sa “nagmando niining kalibotana” (Juan 12:31).

P: SA Gingharian, unsa man ang awtoridad nga gihatag Ni Jesùs sa iyang mga Apostoles?
T: Gipili ni Jesus ang napulog duha, ang umaabot nga mga saksi sa iyang Pagkabanhaw, ug gipaambit niya sila sa iyang misyon ug sa iyang awtoridad sa pagtudlo, pagpasaylo sa mga sala, ug pagtukod ug pagdumala sa Simbahan. Dinhi niining maong pundok, gidawat ni San Pedro “ang mga yawe sa Gingharian sa langit” (Mateo 16:19) ug gidawat ang unang puwesto uban sa misyon sa pagbantay sa pagtoo sa kinatibuk-an niini ug paglig-on sa iyang mga igsoon.