Ang Sala sa Corruption kinahanglan Ampoan ug Hinolsolan sa tanan

Dili nato ikalimod nga ang mga nagagawas karon sa mga dinagkong anomalia sa panggamhanan, kauban kitang tanan nga reponsabli niini. Pinaagi ba sa atong kaugalingong binuhatan o sa dili pagbuhat sa angayng buhaton. Ang pagkontsabo sa daghang mga katawhan, sa pagkawat sa kaban sa gobiyerno, tinuyuan, grabe, ug hilabihang nagadaot sa kinabuhi, dili lamang sa mismong mga kawatan, apan niadto usab nga mga gihikawan sa saktong kabuhian sa ilang pamilya, ilabi na ang bagang hut-ong sa mga kabos. Kini ang labing dakong DISGRASYA bunga sa binuhatan sa tawong mga hakog ug wala nay ulaw nagpasulabi.

Maayong balita nga ang tulo ka maisogon ug ligdong mga babaye nga sila Sec. Leila Delima, Chairman Maria Gracia Pulido Tan, ug Ombudsman Conchita Carpio Morales maoy mga gitahasan nga magtinabangay sa pagtutok ug pagimbistigar niining dakong kawat sa atong nasud. Murag makalaom kita ug aksyon alang sa kamatuoran ug kaangayan. Angayan lamang nga ang tanan nga nagmahal sa nasud, tabangan ug paluyuhan sila ug ang paningkamot sa tagsatagsa ka nila ka ahensiya. Hinaot nga magbunga kini sa panahon kanus-a dunay mapamatud-an nga nakalapas sa balaod, mahukman ug masilotan nga angay sa mga kriminal.

Apan sa laing bahin, aduna usab kamatuoran bahin niining kahimtang sa nasud nga angay matngonan ug bantayan. Ang lawom nga hinungdan sa pagakadaot sa kulturang matarong sa Pilipino mao ang padayon ug nagkagrabeng paguyon ug pagsugot nato sa SALA sa KAHAKOG, nga maoy sukaranan sa laing mga dautang binuhatan, pamakak, panikas, panlimbong, pangawat, pagsuborno ubp. Kini nahimo ng usa ka kaulipnan ug gapos sa SALA UG KADAUTAN, dili lang panagsa nga pagpakasala tungod sa kahuayang. USA KINI KA SPIRITOHANONG KAULIPNAN. Dili kini masulbad pinaagi lamang sa tawhanong mga ahensiya sama sa DOJ, OMBUDSMAN, COA.

Ang spiritohanong gahum lamang sa Dios mao ang makalupig niini – ang MAAYONG BALITA NGA SI KRISTO, kinsa mao ang Dalan, Kamatuoran, ug Kinabuhi. Siya lamang ang Kaluwasan – ang iyang tawag sa PAGHINOLSOL UG PAGSUNOD SA MGA KASUGOAN SA DIOS. Alang sa katumanan niining kabag-ohan sa mga kasingkasing sa Pilipino, gawas sa pagsangayaw sa Maayong Balita, mahinungdnon nga kitang mga Katoliko ug ubang mga magtotoo, magpadayon sa pag-ampo sa Dios alang sa Nasud Pilipinhon aron mahibalik kita sa pagkahimong Diosnon ug Matarong nga Nasud.

Niadtong Agosto 26, panahon sa 1M March kontra sa Pork Barrel, buot nakong ipaambit kaninyo ang pag-ampo ni Cardinal Chito Tagle nga gigamit usab namo didto sa Cagayan de Oro sa Prayer Rally nga akong giapilan niadtong adlawa usab:

PAGAMPO ALANG SA NASUD TALIWALA SA ISKANDALO SA PORK BARREL ni Cardinal Luis Antonio Tagle (gihubad ni Mons. Boy Salvador)

Mahigugmaong Dios, Nagapasalamat kami sa imong dakong kaayo kanamo. Nagapasalamat kami sa mga bantugang Pilipino ug sa among gimahal nga nasud nga Pilipinhon. Pasayloa kami sa among myng ga kalapasan, pagpasulabi ug dakung pagmakulang. Duyogi kami sa among panagtigom karong adlawa. Pahumoka ang mga nagmatig-a nga kasingkasing. Ablihi ang mga mata sa mga nagpakabuta. Magsulti unta sa kamatuoran ang mga ngabil nga nangaamang. Mahimong yano unta ang kinabuhi nila nga mga nahilig sa naghinobrang bahandi. Makigdugtong unta sa isigkatawo ang mga nakulong sa kaugalingon lamang. Madungog unta namo ang mga dangoyngoy sa mga kabus. Mag-alagad unta kami sa walay pagpaabot og bayad. Mangahimo unta kaming maligdong diha sa tanan namong panghunahuna ug pagpamuhat. Maghari unta ang imong kaangayan sa Ngalan ni Jesukristo ug sa Gahum sa Espirito. Amen.

jimmg48@gmail.com