Year of Faith Trainors’ Training gipahigayon sa Toril

Gipahigayon sa Sto. Rosario Parish, Toril ang Vicariate Trainors’ Training sa Year of Faith kaniadtong August 18, 2013 nga gitambongan sa lima ka mga parokya nga mao ang Immaculate Conception Parish, Sto. Rosario Parish, San Lorenzo Parish, Virgen de los Remedios Parish, ug Holy Family Parish.

Ang maong training naga hisgot sa module nga nabahin sa tulo ka parte. Ang unang parte mao ang Porta Fidei nga gisaysay ni Msgr. Abel Apigo. Ang ikaduhang parte mao ang Summary sa Vatican II nga gipaambit usab ni Msgr. Abel Apigo. Ang ikatulong parte nga gihimoan ug link ang Vatican II sa Catechism of the Catholic Church nga gihisgotan ni Auxiliary Bishop George Rimando. Ang CCC mao ang mamahimong ika upat nga parte sa module. Kini ang introduction sa systematic nga pagpadagan sa simbahan isip usa ka Archdiocese.

Sa unang parte, gipasabot ni Msgr. Apigo kung unsa ang Porta Fidei, kanus-a kini nagawas ug nalunsad ug kung kanus-a kini mahuman. Matod pa ni kay Msgr. Apigo nga ang Porta Fidei na ipagawas kaniadtong October 11, 2011, ug na ilunsad kini October 11, 2012 ug kini mahuman karong umaabot nga November 24, 2013. Ang porta fidei mao ang sulat apostolohikanon nga nagpahibalo ug nagpasabot sa “Tuig sa Pagtoo”.

Sa ikaduhang parte, nag hisgot si Msgr. Apigo mahitungod sa Summary sa Vatican II. Iyang gipasabot sa mga partisipante ang unod sa maong dokumento.

Ang ikatulong parte ang gipaambit ni Auxiliary Bishop George Rimando diin iyang gibutyag nga ang pagtuo kinahanglan nga i-update pud. Dungang pa niya, “ang pagtuo sa apostoles ipadayon sa katuigan.”
Dugang pa sa Auxiliary Bishop nga migamot kita gikan sa gugma sa atong Diyos Amahan, Diyos Anak ug Diyos Ispiritu Santo. Diin adunay upat ka parte. Ang pagtoo nga gipadayag, pagtoo nga gisaulog, pagtoo nga gikinabuhi ug pagtoo nga gi-ampo.

Matod pa ni Auxiliary Bishop nga ang CCC (Catechism of the Catholic Church) nagsilbing giya sa pagpanudlo. Ang CCC nabuhat kaniadtong January 25, 1985.

Sa katapusan adunay mubo nga diskusyon gikan ni Rev. Fr. Leonardo Dublan Jr. diin iyang gituki ang krisis sa pagtoo nga matod pa niya s pagka karon ang pagtuon mabaw na, ang pagsaulog nahimong nga ritual, ug ang pagmantala hinay na. Matod pa niya dapat unta nga ang pagtuon mao ang pag deposito sa pagsalig, ang pagsaulog buhing sakramento ug ang pagmantala ang pagtoo nga gipuy-an. Dugang pa ni Rev. Fr. Dublan, “ang pagtoo mahimong tuburan sa atong kalipay.”
Matod pa ni Lea Arabis, parish youth apostolate secretary sa Virgen Delos Remedios Parish , “ok siya, mas napa deepen ang akoang pagsabot about faith kay lisud man kaayo nga magtuki mi ug isa ka module nga ang imo mga kauban mga batan-on. Naa’y tendency nga ang uban nasabtan, ang uban wala kasabot, ang uban lahi pud ang pagsabot.”

Dugang pa ni Arabis, “what we usually do is mas naga pangita mi ug lighter nga topic nga same gihapon pero lighter lang ang meaning, and in a way nga maminaw gyud ang batan-on gina tagaan namo sila ug mga activity nga fit in sa topic.”

Sa wala pa gitapos ang maong training gipatapok ang mga partisipante base sa ilang mga parokya ug gipahisgot kanila kung unsa’y angay nilang buhaton sa parokya, unsa’y mga nabuhat na ug unsa ang mga buluhaton nga angay ipadayon sa pagpadagan sa parokya.

By Leah Rose Ann D. Umbay/Contributor