Unsay himoon nimo alang sa Nasud?

Bag-o lang nato nasaksihan ang SONA sa atong Presidente Noynoy Aquino niadtong miaging bulan sa Hulyo. Matud pa niya, gikalipay daw niya karon nga Pilipino siya. Nindot kuno karon bation ang garbo sa pagka Pilipino tungod sa mga kabag-ohan nga nagakahitabo sa katawhan, sa kahimtang sa panggamhanan ug diha sa tibuok sosyodad.

Tinuod nga duna pay daghan nga tarungon ug han-ayon aron mainsakto ang dagan sa kinabuhi sa mga lungsuranon. Ang mga pasaway ug palaban nagpadayon pa man ug nagduggang pa sa ilang mga dautang mga buhat. Tungod niini angayan nga magbinantayon, magmalahutayon, ug magmamlig-on ang tanan sa krusada alang sa kamatuoran, kaangayan ug katarong, kalinaw ug kauswagan sa personal ug katilingbanong pagkinabuhi.

Ang Presidente mihagit ug midasig kanatong tanan nga bag-ohon ang atong negatibong panghunahuna ug pagbati bahin sa nasud. Inay magpalusot o pagtabon sa dautan, moangkon hinoon ug magbayad ug mag-bag-o. Imbis nga padayong pamasangil ug panaway sa uban, himoon hinoon lamang sa matag usa ang maayo ug matarong aron makatabang sa kalamboan sa kadaghanan.

Sa ato pa, ipasigarbo ang kaugalingong nasud ug magtampohanay sa pagpausabaw pa sa katarong ug kaayo alang sa kauswagan sa tanan diha sa katilingban.

Samtang naminaw ko niini, nahinumdum ko sa gihimo ni Alex Lacson kaniaddto, kinsa misugyot sa 12 ka gagmayng butang nga mahimo sa tanan. Ania ang akong paghubad niini sa Cebuano:

12 ka butang nga mahimo sa matag Pilipino
aron sa pagtabang sa nasud

1. Sunda ang lagda sa trapiko. Sunda ang balaod.

2. Matag palit o bayad nimo sa bisan unsa pangayo kanunay og resibo.

3. Bayari ang imong buhis.

4. Ayaw pagpalit og mga kontrabandong butang o kasangkapan. Palit sa atong kaugalingong produkto.

5. Tahora ang imong kawani sa trapiko, pulis, sundalo.

6. Ayaw pagpataka og labay sa basura. Ilabay ang basura sa insaktong paagi. Ilahi ang madunot sa dili madunot. Risaykol. Pagdaginot.

7. Suportahi ang imong Simbahan.

8. Panahon sa piniliay, buhata ang imong solemneng katungdanan.

9. Bayari ang imong empleyado sa husto ug angay.

10. Sagop og usa ka iskolar o kabus nga bata.

11. Pagtarung sa imong pagkaginikanan, Tudloi ang imong mga anak sa pagsunod sa balaod ug sa paghigugma sa atong nasud.

12. Kon makighinabi ka sa uban, ilabi na sa mga langyaw, hisguti lamang ang mga maayong butang mahitungod kanato ug sa atong nasud.

Kining napulo ug duha ka mga butang hinayhinay magmugna og bag-ong kultura alang sa Pilipino dinhi sa Pilipinas. Sa pagkatinuod, dili kini impossible kung gusto sa tawo. Kon dili, nan daghang dahilan nganong dili himoon..

Nasayod kita nga kon unsa man ang dili ikalipay ug ikapsigarbo nga kahimtang sa nasud karon, nakatampo ang matag usa niini ug busa, anaa ra usab sa matag usa ang pagbag-o niini. Dili lamang ang Presidente ang dunay kaakuhan alang sa kalamboan. Ang matag bata, batan-on, hamtong ug edaran adunay ikatampo ug angay nga itampo.

Tama na ang kanunay nga tinulakay, kanunay nga paunahay, kanaunay nga panag-away ug palabwanay. Ang kinahanglan nato mao lamang ang panaghiusa ug panaglambigitay alang sa kaayuhan sa kinatibuk-an.

Busa IKAW, unsay himoon nimo alang sa nasud?

Email: bpjim0712@yahoo.com