PSK Agosto 2013

“Kon mao ray higugmaon ninyo sila nga nahigugma kaninyo, nganong magpa-abot pa kamog panalangin? Bisan gani ang mga makasasala nahigugma man niadtong nahigugma kanila!           (Luc 6:32)

Ang Pulong sa Kinabuhi ning bulana kinutlo gikan sa Ebanghelyo ni Lucas. Kabahin kini sa lapad nga gitudlo ni Jesus nga mohaum sa Ebangelyo ni Mateo nga gitawag ug “Wali Didto sa Bungtod.”  Aning bahina sa Ebanghelyo, nasayod ta nga gihulagway ni Jesus ang mga kondisyon aron mahimo tang kabahin sa Gingharian sa Dios ug ang linya nga angay subayon isip timailhan niadtong mga nahisakop niini.  Kini naghatag ug inspirasyon ug nagdala kanato sa pagsundog sa atong Langitnong Amahan.

Niining tudlinga, gi-awhag ni Jesus ang mga tinun-an sa pagsunod sa gugma sa Dios Amahan.  Kon buot tang mahimong mga anak Niya, kinahanglang higugmaon nato ang atong isigkatawo sa Iyang paagi sa paghigugma.

“Kon mao ray higugmaon ninyo sila nga nahigugma kaninyo, nganong magpa-abot pa kamog panalangin? Bisan gani ang mga makasasala nahigugma man niadtong nahigugma kanila!    

Ang unang timailhan sa dakong kalainan sa gugma sa Dios Amahan diha makita nga libre kining gihatag. May dakong kalainan kini sa gugmang kalibutanon. Ang gugmang kalibutanon, pinasikad sa binalosay, (higugmaon nato ang tawo nga nihigugma o nakapahimuot kanato); ang gugma sa Amahang Langitnon walay kondisyon; ang paghatag sa iyang kaugalingon wala mag-paabot  nga  balosan.  Ang kinaiya ning gugmaha diha makita nga maoy mo-una sa pagpakig-ambit sa tanan niyang gipanag-iya.  Sangpotanan aning gugmaha ang makapatukod ug makapausab. Gihigugma kita sa atong Langitnong Amahan dili tungod kay maayo  tang mga tawo, ug maanindot ang atong espiritu, busa, angayan ta sa iyang pag-atiman ug pag-amuma; hinoon, ang iyang gugma, makapahimugso sulod sa atong kasingkasing ug kaayo ug espirituhanong katahom sa grasya nga nakapahimo kanato isip iyang mga higala ug mga anak.       

“Kon mao ray higugmaon ninyo sila nga nahigugma kaninyo, nganong magpa-abot pa kamog panalangin? Bisan gani ang mga makasasala nahigugma man niadtong nahigugma kanila!

Usa pa gyud ka hiyas sa gugma sa Dios Amahan mao ang pagka-malukpanon niini.  Ang Ginoo nahigugma sa tanan ug walay pili-pili.  Ang sukod sa iyang paghigugma mao ang pagkawalay sukod ug utlanan. Ug dugang pa, kining gugmaha dili unta mahimong libre ug mabungahon kon wala pa kini gitumong sa nagkinahanglan o kahaw-ang nga angay tagbawon. Mao kini ang hinungdan nganong gihigugma sa Langitnong Amahan bisan kadtong dili mapasalamaton o nahilayo o mga masupilon kaniya. Hinuon, gibati Niya ang talagsaon pagkadani ngadto kanila..

“Kon mao ray higugmaon ninyo sila nga nahigugma kaninyo, nganong magpa-abot pa kamog panalangin? Bisan gani ang mga makasasala nahigugma man niadtong nahigugma kanila! 

Nan, unsaon man nato pagpuyo aning Pulong sa kinabuhi ning bulana?

Pinaagi sa pagpuyo sa mga pamatasang subay sa tinuod nga mga anak sa Amahang Langitnon, ang buot ipasabot: sundogon nato ang iyang gugma, ilabina sa mga hiyas nga atong gipatigbabaw:  libre ug malukpanon. Nan, maningkamot ta nga kita’y mouna sa paghigugma nga manggihatagon, matinabangon, abli sa tanan, labina sa kahaw-ang nga mabatyagan nato sa atong palibot. Paninguhaon nato ang paghigugma sa walay  pagpaabot sa  resulta  niini.  Manlimbasog ta nga mahimong instrumento sa pagkamanggihatagon sa Dios,  aron matagamtam usab sa uban ang mga gasa sa kinaiya o mga grasya nga atong nadawat gikan Kaniya.

Kon tugotan nato nga kita magiyahan niining  Pulong ni Jesus, mabag-o ang atong panan-aw ug mabag-o ang atong kasingkasing ngadto sa mga tawo nga molabay sa atong atubangan sa  matag higayon nga ipaambit nato diha sa adlaw-adlawng kinabuhi.  Ug asa man gani kita naglihok  (sa pamilya, eskwelahan, lugar sa trabaho, hospital ug uban pa), ma-amgohan  nato nga may motulod kanato sa pagpakig-ambit ning gugma nga gikan sa Dios, nga gidala ni Jesus dinhi sa yuta; gugmang mao ray  makapabag-o sa kalibutan.

Chiara Lubich