Pamilya alang sa ebangelisasyon sa DMSP

MATI CITY – Ang Divine Mercy Shrine & Parish (DMSP) sa Madang, Siyudad sa Mati, ang nagapahigayon og tig-duha ka adlaw ngaEvangelization Formation Seminar sa matag semana alang sa mga Gagmayng Kristohanong Katilingban (GKK) sa unom ka sona nga sakop sa parokya, sugod niadtong tunga-tunga sa bulan sa Hulyo.

Sumala sa mga nagdumala niini, ang maong kalihukan ginatambungan gayud sa mga gihikanan isip mga haligi sa pamilya ug sa ilang mga anak nga husto ang panuigon, kay “Ang Pamilya nga magkahiusa sa Pag-ampo magkahiusa usab sa Pagpuyo” (“The Family that Prays Together Stays Together”- motto ni Fr. Patrick Peyton, pundador sa Family Rosary Movement).

Ang kinatibuk-ang kalihukan gipangulohan sa pagdumala ni Fr. Samuel R. Broñola ang kura paroko, inabagan sa iyang core group nga mao sila si: Bro. Willy N. Ukay, Bro. Dalmacio C. Aperdo, Bro. Francis A. Cormanes, Sis Leoncia B. Rodriguez, ug Sis Necitas B. Mabandos.

Gisunod sa Core Group sa ilang pagpa-ambit og mga kasinatian ang pito ka mga tema o modules pinasubay sa kasaulogan sa Year of Faith of Pope Benedict XVI  sa tumong nga mapalig-on, mapalambo ug magmabungahon ang mga GKK sa pagka-maampoon, maalagaron, ug mahiusahon sa Misyon ni Kristo.

Ang Core Group usab nakamatngon sa kalipay sa mga opisyales sa mga GKK sa nasangpit nga kampanya sa pagpalig-on sa pagtoo ug pagbag-o sa kaugalingon kon renewal sa pundok pinaagi sa partisipasyon sa matag pamilya.

Gipasabot usab ni Fr. Broñola nga ang dili motambong sa gipahigayon nga Ebanghelisasyon ang dili na usab isipon nga sakop sa GKK, busa usa kini ka hagit sa matag pamilya kon unsa ang ilahang palabihon—ang mga butang kalibutanon ba o ang mga butang nga langitnon.

Magpadayon ang mga Evangelization Formation Seminars hangtud matapos ang kasamtangang Tuig sa Pagtoo sa Nobyembre 24 ning tuiga.Samtang, sa laing bahin, gilantaw ang maong buhat sa Ebanghelisasyon nga usa ka gasa sa Diyos sa pagsaulog sa DMSP sa ika-pito ka tuig nga kasumaran sa pagkatukod niini kon   karong domingo gayud, Agosto 11, 2013. Happy 7th Parish Day, DMSP! 

Sr. Marietta, OND with ideas from Bro. Willy Ukay