Pagpaubos

Dunay nag-ingun nga ang hari daw sa katubigan mao ang kadagatan. Nganu man? Tungod kay siya ubos sa tanang kasapaan. Tungod sa iyang kaubos ang tanang tubig mopadulong kaniya.

Kung gusto kita nga madasig pagdawat ang tawo kanato kinahanglan kitang magpaubos. Ang tawong mapaubsanon makakabig ug daghan padulong sa Dios apan ang tawong mapahitas-on makapabugnaw sa uban ug makapalayo sa isigkaingun ngadto sa Dios.
Mao nga si Kristo nagpahimangno kanato karon sa Ebanghelyo nga mopili kuno kita sa ubos nga dapit kung kita giimbita sa usa ka kombira. Imbis kita magpaimportansiya ug magpatagad gayod, kinahanglan kitang magpakaubos. Apan unsa man ang tinuod nga pagpaubos.

Ang tinuod nga pagpaubos mao ang pagdawat sa kamatuoran. Mini ug dili tinuod nga pagpaubos ang pagkamaulawon bisan duna kitay ikapaambit. Dili tinuod nga pagpaubos ang pagtago sa unsay atong mahimo nga kaayo aron ang atong talento makaalagad sa katilingban.

Duna ba kitay kinaiya nga magpadili-dli kon tagdon apan kondili matagad manluod? Duna ba kitay kinaiya nga magpakahilumon apan kung dili pasultihon mahiubos? Duna ba kitay kinaiya nga magpaluyo lamang apan kondili daygon masakit ang buot? Tingali kon naa kita niini basin kulang pa kita sa pagpaubos.

Sama sa giingon sa unang pagbasa buhaton ta ang tanan diha sa pagpaubos. Kay matod pa sa ikaduhang pagbasa mosaka kita sa bukid sa Dios. Ang Dios modapig gayod sa mga kabus nga nagpaubos nga wala mosalig sa ilang kaugalingon apan sa Dios nga nahigugma kanila.

Walay kumo sa pagpaubos. Kay unsa may atong makuha kung kita magpataas o magpasikat o ilhon nga kuyaw atubangan sa tawo apan walay nahot atubangan sa Dios. Dili unta kita ang mouswag kondili ang Ginoo. Dili unta kanato ang himaya ug pagdayeg apan sa Dios. Busa puy-an ta ang pagpaubos.