Pagpangandam sa kalamidad tutokan

Gimugna sa Arkidyosesis sa Davao ang programang pagpakunhod sa epekto sa kalamidad kon DISASTER RISK REDUCTION PROGRAM sa pito ka mga parokya nga nabahaan Enero niining tuiga.

Sumala pa ni Eric Hernandez, usa sa mga pangulo sa Pastoral Team sa San Pablo Parish, gitukod nila ang Quick Response Team nga gipailaluman sa Parish Social Action Ministry. Dugang pa niya, “ang Quick Response Team namo gi-divide namu ug kaupat ka grupo, naay advocacy, naay relief, naay medical, naay rescue.”

Ang advocacy nga grupo mao ang nagapahigayon ug mga seminar sa komunidad bahin sa climate change, sila mao usab ang nagabutyag sa katawhan mahitungod sa disaster risk reduction.

Ikaduha mao ang relief nga grupo nga sumala ni Hernandez mao ang in-charge sa mga programa sa Caritas. Matod pa niya, adunay mga nagahatag ug hinabang ug gi hinaot nga ang service ministry sa parish muapil usab.
Dugang ni Hernandez, “naa mi medical group nga mga youth ang nag-organize nga ang mga courses kay related sa medical, mga nurses, med.tech, ug doctor.”

Sa rescue group nga gina tawag nilang emergency rescue team, dinhi gibutang ang mga kabatan-unan nga apil sa maong programa. Sumala ni Hernandez, “ang among mabuhat karon, kung naga-ulan, naa nami monitoring group sa nagkalain laing lugar.”

Dugang pa niya gitutukan nila og atensyon ang matina aplaya kaniadtong miaging pagbaha dinhi sa Dabaw kauban sa pagtinabangay sa mga barangay. Isa sa mga natabangan nila ang Pag-asa Extension nga gibuhatan nila ug water level indicator ang sapa.

Mipasiugda pud og seminar ang maong programa mahitungod sa Disaster Risk Reduction. Nagahisgot bahin sa kung unsa’y disaster, unsa’y buhaton kung wala pa’y disaster, ug unsa’y buhaton kung mahitabo ang disaster.
Sumala pa ni Sr. Marissa Arado, Finance Officer sa ASAC (Archdiocesan Social Action Center) nga magpahigayon ug meeting ang diocese kabahin sa Disaster Preparedness nga pagatambongan sa Speaker nga mao si Chief Emmanuel Galdon sa Central 911.

Ang maong meeting pagatambongan sa pito ka parokya nga mao ang, San Pablo sa Juna Subdivision, Ascension sa GSIS, San Pedro Cathedral, St. Jude, St. Francis sa Maa, Asumption sa Torres ug St. Mary’s sa Buhangin.

By Leah Rose Ann D. Umbay/Contributor