Misteryo sa Inkarnasyon

P: Sa unsa man nga paagi gipahimutang sa Simbahan ang Misteryo sa Inkarnasyon?

T: Ang Simbahan nagapahayag nga si Jesucristo matuod nga Dios ug matuod nga tawo, may duha ka mga kinaiya: usa diosnon ug usa tawhanon, nga wala managsagol sa usag usa kundili nahiusa diha sa Persona sa Pulong. Mao nga, diha sa pagkatawo ni Jesùs ang tanang butang – ang iyang mga milagro, ang iyang pag-antos ug ang iyang kamatayon – kinahanglan ilhon nga nagagikan sa iyang diosnon nga Persona nga nagalihok pinaagi sa iyang gipanag-iya nga tawhanong kinaiya.

P: Naga-angkon ba ug kalag nga may tawhanong kahibalo ang Anak sa Dios nga nahimong tawo?

T: Ang Anak sa Dios nanag-iya og lawas nga nabuhi pinaagi sa rasyonal nga tawhanong kalag. Sa iyang tawhanon nga pangisip nakakat-on og daghang mga butang si Jesùs pinaagi sa kasinatian; apan usab isip tawo ang Anak sa Dios may suod ug laktod nga kahibalo sa Dios iyang Amahan. Ingon man nasabtan niya ang mga tinagong hunahuna sa mga tawo ug sa hingpit iyang nahibaloan ang mga tunhay nga plano nga iyang gianhi aron ipadayag.

P: Sa unsa mang paagi nga nagbinuligay ang duha ka kabubut-on sa Pulong nga nahimong tawo?

T: Si Jesùs may diosnon ug tawhanon nga kabubut-on. Sa iyang kinabuhing yutan-on ang Anak sa Dios, tawhanong mibuot sa tanan nga iyang gipahamtang isip Dios uban sa Amahan ug sa Espiritu Santo alang sa atong kaluwasan. Sa walay pagsupak o pag-ukon-ukon, ang tawhanong kabubut-on ni Cristo misunod sa kabubut-on sa Dios o sa ato pa nagpaubos ilalom niini.
(Cf. Kompendiyo sa Katekismo sa Simbahang Katoliko, 89-91)