Mga kamatuoran ug kasinatian sa GKK gihisgotan

Sa nagpadayong panagtapok sa mga layko ug mga kaparian sa matag vicariate, mas nakita ang mga kamatuoran ug kasinatian sa kinabuhi ug pagtoo sa tagsa-tagsa ka mga Gagmay’ng Kristohanong Katilingban (GKK).

Niadtong Agosto 17, ang Sta. Ana Vicariate nga gilangkoban sa mga parokya sa Sta. Ana, San Antonio de Padua sa Agdao, Our Lady of Fatima, ug Sacred Heart of Jesus sa Obrero nagpahigayon sa vicariate gathering sa Sta. Ana Shrine Parish aron hisgotan ang sitwasyon sa mga GKK karong panahona.

Sa nahitabong panagtapok, gitan-aw unsa ang kasamtangang kahimtang sa pagtoo, pagka-komunidad ug pag-ampo sa matag GKK sa parokya.

“Akong kalipay nga mahatagan og luna ug gamay’ng panahon ang kining validation bahin sa Kristohanong kinabuhi. This is always a mystery in the life of the Church. Buhi kaayo ang Simbahan,” sumala ni Archbishop Romulo G. Valles nga mitambong sa maong panagtapok.

Giingon usab ni Abp. Valles nga ang Simbahan kanunay naga-uban sa katawhan.
Si Bishop George Rimando, auxiliary bishop sa Dabaw naghatag og pagpa-ambit mahitungod sa simbahanong pundasyon sa GKK.

Giingon niya nga ang GKK kon Basic Ecclesial Communities mao ang “new way of being Church.”
Dugang usab niya nga angay dili bulagon ang GKK sa pagsabot sa Simbahan tungod kabahin ang tanan niini ug tingali mahimong closed-minded ang katawhan ug ang ilang katilingban mao lang ang huna-huna-on.

Dakong kalibay ang nabati sa tanan ilabi na ang mga layko nga mga delegado tungod sa higayon nga nakapadayag sila sa kasamtangang kahimtang sa GKK sa ilang tagsa-tagsa ka mga parokya.