Kinsay responsabli sa Pangawkaw sa “Pork Barrel”

Sa usa ka bahin, makatawa ko, apan sa laing bahin, maglagot ko’g maminaw ug motan-aw sa mga hingtungdan nga nagsigi’g palusot, pamasangil, panabon ug pangambot, ug paghilom atubangan niining kasaysayan sa pangawkaw sa panudlanan sa gobiyerno.

Ingon niini ang nagagawas karon sa atong atubangan. Sa iyang ka komplikado ug sa kadaghan sa nagkakontsabo sa pagpahimulos sa dinagkong salapi sa katawhang Pilipino, sa pag slow motion ini sa pagpahayag sa proseso ug si kinsa ang mga hingtungdan, napasayon ang pagsabot karon sa kahimtang niini.

Mas naklaro karon nganong kaniadto pa, Cubscout pa ko, hangtud karon, panagsa ra gayud mapasad-an ug mahukman niining binuang, o kon wala ko masayop, wala man gani bisag usa suguro. Maayo kaayo pagka diskarte sa daghang mga dautang tawo nga nagpahimulos niini sa dugay nang panahon. Naglambigitay ang ilang mga dautang mga tinguha ug nagmalamposon sila. Migamot na gayud sa pamuyo ug pamaagi sa politika. Ang mga kabatan-onan natakdan na niini. Nahimo na siyang bahin sa sistema, sa kultura sa “Corruption.”

Tungod niini, makasabot kita nganong nakaingon gayud si SEC. LEILA DELIMA, ang atong kugihan nga Justice Secretary, naglisod sila pagdakop sa usa ka suspect tungod kay siya “well connected” hawak niya ang daghang dagkong tawo.

Sa paglabay sa taas nga panahon, nidaghan na, nilawom na, nikaylap na ang maong binuang sa daghang ahensiya ug transaksyon sa gobiyerno. Kinsay nagabayad? Kinsay gikawatan niini? Kinsay naalaot niini? Ang KADAGHANAN SA MGA LUNGSURANON nga masinugtanong nagabayad og buhis. Sila nga sa makadaghan maoy mga nagapos sa kawad-on ug nahimo na lamang nagasalig sa mga gamhanan, sapian, ug dungganan aron mabuhi.

Ug ang uban nga nakapahimulos, nabahinan sa benipisyo, nabalatohan sa gipangawat, nagpakabuta na lamang, nagpakabungol, ug nagpakahilom. Kay kuno, hangtod karon makaayo man kuno sa katawhan nga gialagaran. Tarungon lamang kuno ang pagpahigayon ug ang paggamit. PASTILAN OY! Motoo pa ba mo ana?

Basta, nakahibalo na kita kinsa na sila. Magmata na gayud kita. Magbinantayon. Magapakabana. Molihok na gayud kita alang sa kausaban niini. Una. wala-on ang higayon sa pagpangawat niiini. Ikaduha, ihunong una ang pagrelease ug paggamit sa pundo sa PDAF hangtud wala pay klarong pagpasabot sa mga panghitabo ug naklaro kinsa ang mga responsabli niining pangawkaw. Ikatulo, kon apil ka sa bisan unsang bahin niining panaglambigit sa pagpangawkaw, TAMA NA, HUNONG NA, MALOOY KA sa mga hinikawan, MAHADLOK KA SA DIOS, MAULAW PUD KA nga ang gipakaon nimo sa imong mga kapamiya, mga kinawat. Kinhanglan na nga makalingkawas kita niining atong kahimtang.

Daghan salamat Chairman Maria Gracia M. Pulido Tan, ug sa tanan nimong maayo ug sulondong mga kauban sa Commission on Audit kinsa nagpahigayon ug mipahayag sa ilang report sa special audit sa 2007-2009 PDAF. Ang kinaiya nimo Secretary Tan haom gayud sa imong ngalan. Sama ni Maria atong Inahan, Gracia ka alang kanamo. Tungod kaninyo diha sa COA mahibalik ang pagsalig kaninyo sa katawhan. Timaan kini nga mahimo pa diay kitang molaom sa kausaban.

Sumala sa giingon pa ni Sec. Tan, ang lain nang ahensiya sa panggamhanan unya ang mo aksyon niining tanan – ang Department of Justice ug Ombudsman. Duha ka ahensiya nga gipangulohan usab qog mga maayo ug ligdong mga tawo. Hinaot nga dili kita mapakyas, pagusab, sa pagkab-ot sa hustisya, kalinaw ug kaugmaran alang sa tanan.