Kinsa ang maluwas?

IKA 21 NGA DOMINGO SA ORDINARYONG PANAHON C
Is. 66:18-21/Heb. 12:5-7,11-13/Lk. 13:22-30

Kinsa kaha ang maluwas? Maluwas kaha ko? Gusto ba gayod sa Ginoo nga ang tanan maluwas? Sayon ba kaha o lisod ang pagsulod sa Gingharian sa Dios? Pipila lamang kini sa mga pangutana sa usa ka magtotoo nga nangandoy nga maluwas ug nagatoo nga adunay kaluwasan nga gitagana sa Dios sa matag-usa. Ang usa ka tawo sa atong ebanghelyo nangutana usab kang Jesus, “Ginoo, gamay raba ang maluwas?”

Sa kabahin sa Ginoo, iya gayod nga gikalipay pag-ayo ang paghatag kanato ug kaluwasan. Si San Pablo ngadto sa iyang unang sulat kang Timoteo 2:3-4 nagkanayun, “Mao kini ang tama ug gikahimut-an sa atong Ginoo ug manluluwas, nga nangandoy sa kanunay nga kitang tanan maluwas ug makahibalo sa kamatuoran mahitungod kaniya.” Sa mga nagatoo kaniya, kini ang ang ilang giangkon nga konbeksyon ug kamatuoran sa pagtoo nga dili na mausab. Ang simbahan kanunay nga naghupot, nagtudlo ug nagsangyaw niining maong kamatuoran sa atong pagtoo. Ang simbahan wala mohunong diha sa pagsanyaw ilabina sa pag-awhag sa katawhan mahitungod niining kamatuoran nga gusto sa atong Ginoo nga kitang tanan mahatagan ug mahimong kabahin sa iyang gingharian. Kini dili usa prinsipyo o ideolohiya lamang kung dili usa ka kamatuoran sa atong gihuptan nga pagtoo.

Ang unang pagbasa niining domingoha gikan sa sulat ni Propeta Isaias naghulagway sa usa ka panan-awon (vision) nga nakita ni Propeta Isaias ug kini naghisgot mahitungod sa usa ka panagtapok sa tanang katawhan sulod sa Templo sa Jerusalem. Ang templo sa Jerusalem nahimong saksi ug nahimong balay ampoanan sa tanang katawhan nga nagagikan sa nagkalain-lain mga nasud. Kining panan-awon nagpasabot lamang sa dakong kalipay sa Ginoo sa pagtapok sa tanang katawhan ug sa dakong plano sa Dios sa pagluwas kanato.

Makaiingon kita nga si Jesus sa atong ebanghelyo nagpasabot usab niining maong kamatuoran sa atong kaluwasan ilabina sa tawo nga nangutana kaniya. Susama nga miingon si Jesus, “Oo adunay kaluwasan. Gikalipay sa akong Amahan ang paghatag niini alang sa tanan apan diyotay ra ang makaangkon tungod kay lisod ang dalan nga pagaagihan sa pagsulod niini.”

Ngano kaha nga mao kini ang tubag ni Jesus sa tawo nga nangutana kaniya? Susama ba usab kini iyang gisulti sa laing teksto sa ebanghelyo, “Daghan ang gitawag apan diyotay ra ang gipili?” (Mt. 22:14)

Kita gisultihan karun nga sa bahin sa Ginoo, kitang tanan giimbita arun makaangkon niining makahulaganun nga kinabuhi nga gitagana sa Dios kanato. Apan ang Dios lamang ang nakahibalo sa unsang paagiha kini iyang ipadayag sa matag-usa. This is always seen as results of God’s concrete act of love and mercy. Ang atong paningkamotan mao nga makasiguro nga unta usa kita niining panagtapok sa tanang katawhan sa Templo sa Jerusalem.

Sa atong bahin diay mao ang pagpaningkamot sa pagpili niini sa matag gutlo sa atong kinabuhi (Daily choice of God) aron kita makaangkon niining grasya sa kaluwasan sa Ginoo. Kining kanunay nato nga pagpili sa Ginoo sa matag-adlaw makahimo unta kanato nga maayo ug solundon diha sa mga birtud sa Ginoo aron kita mahimong maayong Kristiyano sa mata sa Dios ug sa mata sa mga tawo. Kining matag-adlaw nato nga pagpili magdala usab unta kanato sa pagtubo sa pagpuyo sa kamatuoran, kalinaw ug gugma sa Dios.

Sa paghimo nato niini kinahanglan magmalig-on kita ug mangayo kita sa inspirasyon sa Balaang Espiritu ug grasya sa Ginoo kay sa atong bahin usab kita pwedeng makapili dili o batok sa kabubut-on Dios nga maoy makapukan sa kaugalingon ug makapahilayo kanato sa Ginoo.

Tara…piliion nato ang Dios aron kitang tanan magkuyog pagsaka sa bungtod sa Jerusalem ug sa kanunay magdayeg ug magpasalamat atubangan sa Dios.

Fr. Edilberto Mahinay/
St. Francis Xavier Regional Major Seminary