Buhing Pagtoo gitinguha sa San Ignacio Fiesta

MATI CITY – Duha ka mga parokya sa diyosesis sa Mati ang magkasunod nga nagsaulog sa ilahang patronal fiesta ni San Ignacio de Loyola—una, ang San Ignacio, Luzon, Governor Generoso sa Gulf Towns niadtong Hulyo 30, ug ikaduha sa sunod nga adlaw Hulyo 31 sa Coastal Towns, ang San Ignacio, Manay, Davao Oriental.

Parehong gitinguha sa duha ang pagpalig-on sa pagtoo ning kasamtangang Year of Faith pinaagi sa tema nga “Buhing Pagtoo, Giya sa Nagkahiusang Kristohanong Katilingban”; kini sumala usab sa gikauyonan sa mga lider pastoral sa pagpanguna sa nagkadaiyang kura paroko: Fr. Joel A. Sayson sa Luzon ug Fr. Bernard M. Albao sa San Ignacio.

Pagtoo maoy maingon nga duso sa mga kasaulogan sa Eyukaristiya labi na sa 9 AM Episcopal Concelebrated Mass atol sa fiesta ug ubang tradisyunal nga mga kalihokan – mga adlaw sa nobena, procession, bunyag, kompirma, general cleaning, mga paugnat sa kusug sa basketball para sa Luzon, ug alang sa San Ignacio, ang Optical Check-up pinaagi ni Dr. Wendell Salimbagat, Float Parade ug Coronation Rites sa Rayna sa Parokya inubanan sa walo niya ka mga Prinsesa.

Nag-una si Ms. Chiara Mae Laguidong sa Manay NHS isip Queen of SI Parish 2013, sinundan ni Princess of Love Abegail Antonio sa Brgy Holy Cross, Princess of Peace Jewell Mae Macombo sa 4Ps Municipal Link, Princess of Unity Laarni Ladion, Princess of Faith Lovee Faith Ampilanon, Princess of Hope Wenjie Mamada, Princess of Humility Irene Joy Mallas, Princess of Altruism Renalyn Sibayan, ug Princess of Chastity Riza Masanguid..

Sa iyang mga wali, si Obispo Alo nagpahinumdom sa katawhan sa “pagpuyo gayud sa pagtoo ug pagsalig sa Diyos, ug magpailob sa pagtuman sa Iyang kabubut-on sama sa gibuhat sa atong patron nga wala gayud maglangay sa iyang pagbag-o sa kaugalingon ug sa katilingban, aron nga niining lumalabay nga kinabuhi sa yuta, makabaton kita sa kinabuhing dayon.”

Mga pulong sa pasalama ang giluwat usab sa mga kura paroko sa nagkadaiyang mga sakop-apostolado-organisasyon sa simbahan, mga kaparian ug kamadrihan, kasundalohan, mga sponsors ug managlahing sector sa katilingban nga nagtinabangay aron magmalampuson ang kapistahan ning tuiga—ika 18 para sa Luzon, Gov. Generoso, ug ika-13 para sa San Ignacio, Manay—To the Greater Glory of God!

Sr. Marietta H. Alo, OND/Contributor