Ang tinuod nga pundok nga angay pasakopan!

(Part 1 of 2)

Daghan ang nagatuis sa kamatuoran ilabi na ang mga nagkadaiyang sekta nga mga fundamentalist kinsa nagatudlo nga dili na kinahanglan ang Simbahan o Iglesia kondili ang pagdawat lamang kang Kristo. Gani daghan na ang magtotoo ang nalingla niini.

Kung atong pamalandongan ang maong tudlo usa kini ka pamaagi sa paghisalaag kanato ngadto sa kamatuoran nga giwali ni Jesukristo ug sa iyang mga Apostoles. Dili gayud mahitabo nga si Kristo ug ang iyang Simbahan managbulag o magkasumpakiay sa usag-usa. Mao kini ang kamatuoran: giluwas kita ni Kristo pinaagi sa iyang Simbahan.

Husto ang pag-ingon nga si Kristo maoy atong bugtong manluluwas dinhi sa kalibutan (Buh.4:12), ug siya ang atong tigpataliwala tali sa Dios ug sa tawo (1 Tim. 2:5), ug ang iyang sakripisyo sa Krus ug pag-ula sa dugo maoy nakaluwas kanato (Hebreo 9:22). Pero angay pod natong hinomdoman nga si Kristo nagtukod usab ug Simbahan (Mateo 16:18). Siya nagpili, nagtudlo ug nagpadala ug mga punoan o lider aron sa pagdumala niini dinhi sa kalibutan ug nagtugyan ug gahum ug awtoridad sa pagdumala (Mateo 16:19, Mateo 18:18), ug nagsugo kanila sa pagsangyaw sa ebanghelyo, pagbunyag ug pag-giya sa iyang katawhan (Mateo 28:19-29).

Kining tanan nagapadayag nga ang Simbahan dako gayud ug kalabotan sa atong kaluwasan ug sukwahi gayud sa ginawali sa pipila ka mga sekta nga dawaton lamang nato si Kristo luwas na kita. Kulang gayud kana kay dili pwede ibulag si Kristo ug ang iyang Simbahan, kay ang Simbahan lawas ni Kristo (Colosas 1:18). Gani siya nahigugma ug nagatahod sa iyang lawas nga mao ang Simbahan o Iglesia (Efeso 5:25-27). Ang Simbahan mao ang haligi ug sukaranan sa tanang kamatuoran (1 Tim. 3:15), ug mao ang iyang pagaluwason (Efeso 5:23).

Busa ang Simbahan instrumento aron kita maluwas kay dinhi nato makaplagan ang grasya ug kamatuoran sa atong pagtoo, kay sa maong Simbahan gibilin ni Kristo ang iyang mga pagtulun-an. Ug ang mga nagawali nga si Kristo lang ang dawaton ug dili na kinahanglan ang Simbahan kulang ug dili kompletong Kristo ang giila kay si Kristo maoy ULO SA IGLESIA O SIMBAHAN NGA MAO ANG IYANG LAWAS (Colosas 1:18). Kung mahitabo nga nagdawat ka kang Kristo ug wala nimo dawata ang Simbahan nga mao ang iyang lawas, tingali og lahi nga Kristo ang imong giila ug dili ang tinuod nga Manluluwas.