PSK Hulyo 2013

“Ang tibuok Balaod natingob sa usa lamang ka sugo: “Higugma-a ang imong isigkatawo sama sa imong kaugalingon.”  (Gal 5:14)

Mga pulong kini nga gikan ni Apostol Pablo; mubo, katingalahan, klaro, walay kulang o pakapin. Naghisgot kini bahin sa gugma sa isigkatawo nga kinahanglan maoy sukaranan ug kanunayong nagpaluyo sa Kristohanong kinabuhi. Alang sa Apostol, ang katumanan sa Balaod anaa sa pagtuman aning mando-a. Ang kasugoan nag-ingon: ayaw panapaw, ayaw pagpatay, ayaw pangawat, ayaw kaibog…. Ug nasayod ta nga kadtong nahigugma dili makaako sa pagbuhat aning mga butanga. Kadtong nahigugma, dili mopatay, ni mangawat, ug uban pa.

“Ang tibuok  Balaod natingob sa usa lamang ka sugo: “Higugmaa ang imong isigkatawo sama sa imong kaugalingon.”

Apan kadtong nahigugma, dili lamang maglikay sa daotan.  Abli ang ilang kasingkasing para sa uban; maayo ang ilang mga tinguha ug gibuhat nila kini; nag-tugyan sa kaugalingon hangtud sa pagtugyan sa kinabuhi para sa hinigugma. Tungod niini, Si Pablo misulat nga diha sa paghigugma sa atong isigkatawo, wala lang ta misubay sa kasugoan kondili  “nahingpit nato ang tibuok” Balaod.

“Ang tibuok Balaod natingob sa usa lamang ka sugo: “Higugmaa ang imong isigkatawo sama sa imong kaugalingon.”

Kon ang tibuok Balaod natingob sa gugma sa isigkatawo, nan, ang ubang mga sugo angay lantawon isip mga pamaagi nga naghatag ug kahayag ug  giya unsaon paghigugma sa isigkatawo, taliwala sa mga kasagarang gubot nga sitwasyon sa kinabuhi;  kinahanglan mahibalo ta sa pag-amgo sa  tumong sa Ginoo, sa Iyang pagbuot, diha sa ubang mga kasugoan.

Buot Niya nga mahimo kitang masinugtanon, putli, nagpugong sa atong tawhanong kinaiya, malumo, maloloy-on, kabus ug uban pa aron moarang-arang ang atong pagtuman sa  sugo sa paghigugma.

“Ang tibuok Balaod natingob sa usa lamang ka sugo: Higugmaa ang imong isigkatawo sama sa imong kaugalingon.”

Apan nganong wala man maghisgot ang Apostol bahin sa gugma sa Dios?

Sa tinuod, ang gugma sa Dios ug gugma sa isigkatawo wala ni sila magkasumpaki. Hinuon, ang gugma sa isigkatawo usa ka pagpadayag sa atong gugma sa Dios.  Ang gugma nato para sa Dios napatinuod sa pagtuman sa iyang kabubut-on. Ug iyang kabubut-on nga higugmaon nato ang atong isigkaingon.

“Ang tibuok Balaod natingob sa usa lamang ka sugo: “Higugmaa ang imong isigkatawo sama sa imong kaugalingon.”

Unsaon man nato pagpuyo ning Pulong sa Kinabuhi?

Klaro gayud nga diha lang sa paghigugma sa atong isigkatawo; ang tinuoray nga paghigugma. Buot ipasabot niini ang paghatag sa atong kaugalingon nga way kaugalingong interes. Dili kini gugma kon aduna kitay laing mga katuyoan, bisan pa’g espiritohanon kini, sama sa atong kasantosan. Higugmaon nato ang atong isigkatawo, dili ang atong kaugalingon.

Hinuon, segurado usab  kita nga  ang mga tawong nahigugma nga sama niini, masantos gayod; mahimo silang “hingpit ingon nga hingpit ang Amahan” tungod kay nabuhat man nila kutob sa mahimo ang pinakaanindot nga butang. Tungod kay nasabtan man nila ang kabubut-on sa Dios ug gipuy-an nila kini, natuman nila ang tibuok Balaod.

Dili ba bahin sa paghigugma sa isigkatawo ang ipangutana sa Dios sa kataposan sa kinabuhi?

Chiara Lubich