Pagpaka Maria ug Pagpaka Marta

16^th Sunday of the Ordinary Time
Gen. 18:1-10/Col. 1:24-28/ Lk. 10:38-42

Kitang mga Pilipino naila nga maabi-abihon nga mga tawo.  Ato gayong siguradohon nga ang atong mga bisita makasinati’g nindot ug malipayon nga pagpundo, taas man kini o mubo ra.  Pipila sa atong ginabuhat mao ang pag-andam og pagkaon alang kanila.  Kasagaran atong palingkuron sa sala unya hatagan ug albums sa pictures o kaha ablihan ang television ug unya ingnon nga “diri sa ka ha kay naa sa ko atimanon, just feel at home”.  Busa daghan moingon nga walay dautan nga gibuhat si Marta diha sa atong Ebanghelyo kay gi-abi abi ra man niya si Hesukristo.  Apan human mireklamo si Marta tungod sa daghan niyang giatiman giingnan siya ni Kristo nga nabalaka siya sa daghang nga butang nga dili importante. Posible kaayo moingon dayon ta nga tama ang gibuhat ni Maria nga nagpundo ra atubangan kay Kristo ug mali ang gibuhat ni Marta nga nibiya aron atimanon ang posibleng panginahanglan ni Kristo susama sa pagkaon. Niining paagahia mopili na dayon ta – si Maria o si Marta.  Daghan kanato karon moingon nga si Maria ang atong pilion kay tama siya.

Mga kaigsoonan, ang atong kalibutan karon napuno sa kasaba ug ka-busy sa mga tawo.  Gani ang mga gituohan nga maghatag sa tawo og pahulay ug kagaan sa kinabuhi nakadugang sa kasaba diha kaniya.  Pananglit daghan kaayong mga talk shows sa TV nga nagtuki sa kinabuhi sa mga artista o mga isyu sa atong katilingban. Daghan sa mga kabatan-onan adunay headsets or earphones.  Wala’g tuo usab ang mga kalingawan sa tawo kay daghan usab kanila nagakayod o nagatrabaho dili lang lima ka adlaw sa usa ka semana.  Ang uban pito ka adlaw gayod. Usahay tungod sa ka-busy dili mahatagan ug igong pagtagad dili lang ang Ginoo, apan apil usab ang tagsa tagsa nila ka pamilya. Dili ikalalis nga daghan naningkamot nanarbaho labi na gawas sa atong nasud.  Apan dili usab ikalimod nga daghan sa mga anak nila nga gimingaw sa personal nga pagtagad sa ilang mga ginikanan. Halos tanang mga tawo karon maglisod na paghunong diha sa ka-busy o paghatag og gamay nga kahilom diha sa ilang kinabuhi aron makapamalandong o kaha mohatag og panahon para makig uban sa Ginoo diha sa pag ampo.  Maong kinahanglan gayud nga atong masunod si Maria diha sa atong Ebanghelyo.  Kinahanglan kita mohunong aron atong mapaminawan ang mga pulong sa Dios.  Gawas pa niana, atong matan-awan unsa na may nahitabo sa atong kinabuhi ug asa na man kini padulong.  Ug ato usab mahatagan ug panahon nga makapahulay ang atong nga kapoy nga lawas.  Ang mga Recollections ug retreats dako og ikatabang sa tawo diha sa paghunong.  Ang pag-apil sa Santos nga Misa ug bisan gani ang mga personal nga mga pag-ampo mubo man o taas bililhon usab kaayo aron makahatag ug panahon sa paghunong diha sa kapaspas ug ka-busy sa kalibutan aron makauban ang atong Ginoo. – Busa kinahanglan nga mahisama kita ni Maria diha sa atong Ebanghelyo nga naglingkod sa tiilan sa Ginoo ug naminaw sa iyang mga pulong.

Apan mga kaigsoonan dili pud nato mabalewala ang dakong tabang sa daghang mga Marta sa atong panahon karon. Mga nagkalain-laing panginahanglan, problema o mga concerns gikan sa tagsa tagsa nga panimalay padulong sa katilingban hangtud sa tibuok kalibutan, nahatagan ug mga katubugan o mga initial nga kasulbaran tungod sa mga maayong mga ginikanan, mga maayong simple ug ordinaryong mga tawo sa katilingban, mga lideres nga tinuod nga nagtagad sa ilang ginsakpan ug nagtagad sa kaayohan sa tibuok kalibutan.  Gani dili sukwahi ang ilang mga maayong ginabuhat sa pagtulon-an sa atong Ginoo.  Sa katapusan sa Santos nga Misa kanunay giawhag ang katawhan sa pagpakaylap sa gugma ni Kristo. Ang pagpakaylap sa gugma ni Kristo mabuhat dili lamang sa mga pulong apan diha usab sa pagbuhat ug mga maayong mga butang.  Ang ikaduhang balaod sa gugma sa Ginoo nagkanayon nga “Higugmaa ang imong mga kaigsoonan sama sa imong paghigugma sa imong kaugalingon.”  Busa ang mga pagpakaon sa mga gigutom, pag atiman sa mga nanginahanglan, pagtagad sa mga napasagdan, dinaugdaug ug sinalikway sa katilingban, ug daghan pang mga maayong buhat – mga butang nga ginabuhat sa mga Marta sa atong panahon karon dili dautan, ug kini nahisubay sa kasuguan sa atong Ginoo.  Apan mga kaigsoonan aduna lay gamay nga pahinumdum ang Ginoo kanato basi sa atong Ebanghelyo.  Unsa kini?  Ang pag hatag ug panahon una para sa Ginoo.  Ug ang Ginoo ra ang motukmod kanato sa pagtagad nga puno sa gugma ngadto sa atong mga kaigsoonan dinhi sa kalibutan.  Mas matinud anon ug mas bililhon man gud ang mga maayong butang nga atong mabuhat sa atong mga kaigsoonan kung nagsugod kita sa pakig-uban sa Ginoo aron maminaw sa iyang mga pulong.

Busa, hunong usa ug pagpaka MARIA ug human niana lakaw ug pagpaka MARTA dinhi sa kalibutan.

Rev. Fr. Arnel Tadeo
Parish Priest
Sacred Heart Parish, Calinan