Kapwa

Ikinapulo’g lima nga Domingo sa Ordinaryong Panahon
Dt 30:10-14/Ps 69:14. 17. 30-31. 33-34. 36. 37.
Col 1:15-20/ Lk 10:25-37

Daghan ang gustong mahimong kapwa kay hayahay. Kung magpuyo lang unta kita nga tinuod nga kapwa o isigkatawo sa atong isigkaingon, hayahay ang atong pamuyo. Mao gani nga gitapos ni Hesus ang sambingay pinaagi sa pagpangutana sa Magtutudlo sa Balaod ‘kinsa man sa tulo ang nagpamatuod nga kapwa o isigkatawo sa gitulisan?’

‘Kadtong naluoy kaniya,’ ang tubag sa Magtutudlo sa balaod diin mihagit si Kristo sa pag-ingun, ‘lakaw ug buhata ang sama sa iyang gibuhat.” Kini hagit sa matag usa kanato nga mahimong kapwa o isigkatawo sa matag usa. Sama sa Magtutudlo sa balaod kita nasayod unsay angay apan usahay pakyas kita sa pagbuhat. Usahay nahibalo kita sa unsay makaayo apan dili nato himuon. Kabalo kita unsay matarong apan usahay maglisud kita mobuhat niini.

Apan gipahinumduman kita sa unang pagbasa nga ang pagbuhat sa balaod sa Dios dili lisud kay wala kini didto sa langit, ni sa tabok sa lawod; duol ra kaayo kini kanato, ania ra kini sa atong baba ug kasing-kasing busa makatuman kita niini.

Si San Pablo nagsulat ngadto sa mga taga-Colosas nga si Kristo mao ang makita nga dagway sa dili makita nga Dios kay pinaagi Kaniya gibuhat sa Dios ang tanan. Si Kristo maanaa kanato diha sa Yukaristiya nga atong gikalawat, sa pulong sa Dios nga atong nadungog, sa nanginahanglan nga moduol kanato aron pagpangayo’g tabang. Dili Siya layo kanato kay ania Siya sa matag kapwa ug isigkatawo.

Kung kita mohatag sa mga naglisud dili lang panahon sa kalamidad ug kung ang atong palibot dili abusuhan pinaagi sa paglabay sa atong mga basura sa hustong lugar, kita nahimong kapwa ug nakapadayag sa kaluoy sa isigkatawo. Kung kita responsableng mohimo sa atong mga tulubagon isip trabahante ug mohatag sa husto isip agalon niadtong nag-alagad kanato kita nahimong kapwa ug isigkatawo ngadto sa uban. Busa aron magpuyong kitang hayahay puy-an ta ang pagka-kapwa o pagka-isigkatawo ngadto sa usa’g usa.