Kahiusahan kinahanglan sa disaster preparedness

Panahon sa kalamidad sama sa baha, dili angay nga mag-iya-iya ang mga komunidad.

Kini ang giingon sa Arsobispo sa Dabaw Romulo G. Valles ngadto sa mga layko nga mitambong sa Climate Change Seminar nga gihimo sa Archdiocese of Davao, Hulyo 16, sa Almendras Gym, Davao City.

Dugang ni Abp. Valles, kung ang mga komunidad diin anaa ang mga pamilya permanente ginabaha, kinahanglan magkahiusa ang tanan sa pag-bakwit panahon sa pagtaas sa tubig.

“We have to work together as a GKK, as a parish,” giingon ni Abp. Valles sa iyang pulong pasalamat ngadto sa mga layko.

Kahinumduman nga pipila sa mga parokya ang nakasinati og pagbaha niadtong milabay’ng Enero 20 niining tuiga ug kaniadtong Hunyo 28, 2011 diin pipila ang namatay tungod sa pagtaas sa Pangi River ug Talomo River.

Sa gihimong seminar, si Dr. Gemma Narisma sa Manila Observatore ang usa sa mga resource speakers diin giingnan niya ang mga nanambong unsa ang hinungdan ngano adunay kausaban sa panahon karon.

Dugang niya nga ang usa sa gitudlo nga hinungdan mao ang pagkonsumo sa fossil fuels nga ginagamit sa mga sakyanan, pabrika ug uban pang gamit sa palibot ug sulod sa panimalay.

Gisaysay niya nga tungod kini sa carbon emission nga nagdugang sa pagtaas sa temperatura sa tibuok kalibutan nga maoy nagdugang sa epekto sa pag-usab sa dagan sa panahon.

Gipakita usab ni Dr. Narisma ang pipila sa hulagway sa mga lugar nga nabiktima sa milabay’ng Bagyong Pablo sama sa Davao Oriental ug Compostela Valley.

Gi-awhag usab niya ang mga layko ug pipila ka mga madre ug kaparian nga mahimong mas andam panahon sa kalamidad ilabi na nga ang Pilipinas kanunay makasinati og bagyo, linog ug uban pang natural calamities. (John Frances C. Fuentes/@dcherald)