Dalan paingon sa Bag-o nga Ebanghelisasyon

Is 66:10-14/Ps 66:1-3. 4-5. 6-7. 16. 20
Gal 6:14-18/Lk 10:1-12. 17-20 or 10:1-9

Usa ka Sugbuanon nga nagahimo og mga saloma mipaambit pinaagi sa iyang saloma mahitungod sa hagit karon sa Kristohanong katilingban. Ang awit nagkanayon sa kalapad sa usa ka umahan nga may di maihap nga anihon ug tungod sa kalapad niini, ang pag-ani dili gayud matapos. Kulang usab ang mga saop nga mobulig alang sa maong buluhaton. Apan, ang tag-iya sa maong umahan nagpaabot gayud nga mapailubon sa dugang pang mangangani nga maoy mupuno sa kamalig sa mga ani.

Ingon niini ang sugilanon sa gingharian sa Ginoo nga gihulagway isip usa ka umahan. Ang Dios mao ang tag-iya ug siya nagkinahanglan og daghan pang mangangani aron mogama sa maong katumanan nga mao ang pagpakaylap sa maayong balita sa kaluwasan. Apan, siya usab maoy magpadala ug mag-awhag og mangangani para sa maong gimbuhaton. Kinsa man pud ang mga tawo nga mubuhat niini? Unsa may kinahanglan buhaton aron matuman kini ug magmalampuson?

Ang ebanghelyo karong ikanapulo’g upat nga Dominggo sa ordinaryong panahon naghisgot sa pagpadala ni Hesus sa kapito-ag duha ka mga disipulo aron moandam sa mga lungsod nga pagaadtoan ni Hesus uban sa iyang napulo’g duha ka mga apostoles. Sayud kita nga dili pa husto ang napulo’g duha ka mga tinun-an mao nga mipadala si Hesus sa kapito-ag duha ka mga lalaki.

Buot nga ibutang ang mensahe sa maong ebanghelyo sa konteksto karon. Sa nagkadugay na, ang teknolohiya nagka-high tech na ug daghan ang misalig sa mga benepisyo nga dala niini. Sayud kita nga dako og tabang ang dala niining mga butanga sa pagpadali ug paghapsay sa atong mga buluhaton. Apan, mi-abuso kita niini ug wala nato nabantayan kining pag-abusar. Usahay milapas na kita sa katuyoan niining mga butanga. Mao nga maghatag kini og mga dili maayo nga epekto sa atong tagsa-tasa kanato nga ‘lifestyle’ ug ngil-ad nga kamatuoran, pipila na ang nahimong ulipon niini. Sakit kini bation apan kinahanglan kini lantawon aron magiyahan kita sa atong pagpakabuhi. Ug ang grabe pa, nagdala kining pagka-ulipon sa mga problema sa materyalismo ug uban pa.

Mao kini ang nagapanghitabo sa umahan sa Ginoo karon. Siya, sama sa usa ka “mahigugmaon nga inahan nga nagalipay sa iyang mga anak”, wala nagbiya kanato; inay, nagtawag siya og mga tawo aron mamahimong pari ug relihiyoso aron mobulig sa buluhaton alang sa kaluwasan. Apan isip usa ka Simbahan, ang tawag sa Dios naglangkob usab sa tanang mga layko aron sa pagtambayayong nato, mabuhat nato ang katuyuan sa atong kinabuhi nga mabungahon ug mahinungdanon—kinabuhi nga angay pagapuy-an, ingon pa sa usa ka Greek philosopher nga si Socrates. Sa konkreto nga mga sitwasyon sa atong kinabuhi, mabuhat nato ang tanan pinaagi sa mga pulong ni Hesus sama sa pagpuyo nga yano, sa pagbiya sa tanan tang mga bisyo, sa pagbalik lantaw sa atong kaugalingon, sa paghigugma sa kadait ug labaw sa tanan sa paghigugma sa Dios pinaagi sa paghalad sa isigkaingon bisan sa ordinaryo nga pagpakabuhi.

Mao kini ang diwa sa usa ka disipulo ni Kristo. Wala magkulang si Hesus paghatag kanato og mga panig-ingnan aron makat-onan ta ang paghalad sa atong kinabuhi ngadto sa Ginoo. Labot pa, si Sta. Teresa sa Avila miingon, “Kon kinsa ang anaa sa Ginoo, sa tanang butang wa nay gana. Dios lang igo na.” Busa niining Tuig sa Pagtoo, giawhag kita sa pagbag-o ug pagkaplag pag-usab sa kalipay nga anaa sa pagtoo ug pag-alagad. Kini usa ka lig-on nga sukaranan aron mamahimo kitang epektibo nga disipulo bisan sa ordinary tang pagpakabuhi nga mapaubsanon. Gamiton usab nato ang ‘social media’ ug uban pang matang sa teknolohiya sa pag-asoy sa Maayong Balita. Sa diwa sa pagpasaylo ug kalinaw, makakat-on unta kita sa pagpaambit kang Kristo sa tagsa-tagsa. Mao kini ang tawag paingon sa dalan sa bag-o nga ebanghelisasyon.

(Fr. Anthony Silvosa)