Climate Change Seminar malampuson

Malampuson nga napahigayon ang seminar mahitungod sa Climate Change niadtong ika-16 sa Hulyo sa Almendras Gym, Davao City.

Gatusan ka mga kaparian, relihiyoso ug mga layko ang mitambong ug nakakat-on sa mga pagtulon-an mahitungod sa Climate Change, disaster preparedness ug uban pa gikan sa mga mamumulong nga sila si Dr. Gemma T. Narisma, usa ka scientist gikan sa Manila Observatore ug kasamtangang professor sa Ateneo de Manila, ug mga representante sa Mines and Geosciences Bureau and ug Office of Civil Defense.

Nadungog sa mga mitambong gikan kay Dr. Narisma nga usa sa dakong hinungdan sa pag-usab sa klima sa kalibutan mao ang industriyalisasyon tungod sa paggamit og fossil fuels, ug uban pang binuhatan sa tawo nga nakadaut sa kalibutan.

Nasayran usab nga ang Pilipinas usa sa mga nasud nga permanente makasinati og mga linog, bagyo ug uban pang klase nga natural disturbances tungod sa lokasyon niini nga kabahin sa Circumpacific Ring of Fire diin pipila ka mga bulkan ang nakapalibot.

Gitan-aw usab kung unsa ang mga kahuyang sa mga katawhan ilabi na sa pagpangandam kung adunay mga kalamidad nga muabot sama sa bagyong Sendong ug Pablo.

Si Abp. Romulo G. Valles nagpasalamat sa mga mamumulong ug sa mga tawo nga mitambong tungod sa mga kahibalo nga nakuha tungod sa maong whole day seminar.

“Kung baha-on kita, ang atong GKK ug parokya, dili kita iya-iya. We have to work together. Work as a parish and work as a GKK,” sumala ni Abp. Valles.

“Now we understand how big and small the risks are,” dugang pa niya.

Ang maong seminar gipahigayon usab niadtong ika-15 sa Hulyo kauban ang mga kaparian sulod sa ilang binulan nga meeting didto sa Archbishop’s Residence, F. Torres St., Davao City.