Cateel nagpasalamat sa mga bag-ong pabalay ug kapilya

MATI CITY – Natuman gayud ang damgo sa bag-ong pabalay alang sa 25 ka mapasalamaton nga mga recipient families sa Barangay Poblacion, Sitio Baguidanan, Cateel, Davao Oriental, ug ang pagbendita sa ilang GKK San Pedro Calungsod chapel niadtong Hunyo 21, 2013, adlaw sa Awarding of Certificates of Occupancy sa naasoyng mga biktima sa bagyong Pablo gikan sa National Secretariat for Social Action (NASSA) ug Caritas Internationalisprogram sa pagpataliwala sa Catholic Bishops Conference of the Philippines (CBCP).

Nasaksihan mismo ni Obispo Broderick S. Pabillo, CBCP-NASSA/Caritas Pilipinas National Director ang mga seremonya sa maong adlawa, kauban ang mga lokal nga opisyales sa simbahan, sibil-sibiko, Catholic media (TCTV/DXHM/DXDV) ug sa NASSA: si Fr. Edito S. Baño, episcopal vicar nga nagrepresentar kang Obispo Patricio H. Alo sa Mati, Fr. Danilo C. Fuentes, diocesan Social Action director, Fr. Nestor B. Morata, parish priest sa parokya ni Santiago apostol, NASSA program officer Josephine Ignacio, project officer, Cesaria B. Hugue, mga sakop sa Philippine Army nga nagrepresentar usab kang Brig. Gen. Rey Leonardo B. Guerrero, AFP 701^st INF Brigade Commander, lot owner/Punong Barangay Poblacion Wilbur Y. Chua, GKK President ug beneficiary Roberto Ayag, ug Area coordinator Rocky A. Silverio..

Si Bishop Pabillo, kinsa miabot sa Hunyo 20 sa Cateel gikan sa iyang mga site visitations sa Compostela Valley Province (Comval), Lingig, Surigao del Sur, ug Boston, Davao Oriental, nagsugod sa seremonyas pinaagi sa paghalad sa Misa Concelebrada  sa kapilya; gipadayag usab niya ang iyang kinasingkasing nga pasalamat sa pagtinabangay sa tanang sektor, sa katawhan nga makugihong nanarbaho, ug labi na gayud sa suporta gikan sa lokal ug probinsyal nga kagamhanan, samtang giaghat niya ang paspas nga pagpanarbaho sa mga pabalay nga wala pa matapos sa ubang mga sitio sama sa Lambog, Balinaonao, Langyawan, ug Hulid sa Barangay Aragon, aron dili kini malangan tungod sa ting-ulan.

Kahinumduman nga niadtong Abril 2013, gipahigayon ang Ground Breaking, Memorandum of Agreement (MOA) Signing ug Basic Survival Kit (BSK) distribution sa hingtungdang mga barangay sa Cateel ug Boston sa Davao Oriental ug Lingig sa Surigao del Sur, alang sa kinatibuk-ang mga usa ka libo ka mga recipient families ubos sa Caritas Internationalis Shelter Program sa CBCP-NASSA.  Sa hinay-hinay gipang-apodapod na gayud ang matag matapos nga cluster sa mga resilient kon lig-on nga pabalay.

Nasayran usab gikan sa pundok sa mga katekista nga wala hinganli, nga niadtong Hunyo 18, usa ka misteryosong tawo nga sama gyud sa dagway sa rebulto ni Pedro Calungsod, ang kalit nakita ug nahanw—matud pa, madasigong nakigkolokabildo siya sa pipila kanila, gani gihikap ug giayo ang panglawas sa usa ka lomulopyo nga malipayong nagtestimonyo niini, apan ning tungura gisuta pa ang kamatuoran sa maong pagsaysay.

By Sr. Marietta Alo, OND/Contributor