Be honest even if…

Sa mga simbahan adunay mga karatula nga nakasulat “Be Honest even if others are not, others will not, others cannot.” Kini sogyot alang kanatong tanan nga sundon sa atong mga senador dha sa ilang paggamit sa ilang pork barrel nga matag usa kanila P 250 million matag tuig.

Sumala sa namantala (PStar 6/10/13) ang mga senador wala pa maka-liquidate sa ilang paggasto sa ilang pork barrel. Kung dili sila maka-submit sa ilang liquidation, nan, unsaon nila pagmatuod o pagpatuo sa katawhan nga sila tinuod nga honest? Ug kung dili sila maka-liquidate sa ilang mga expenses nganong hatagan pa sila sa ilang pork barrel pagkasunod tuig? Kung dili sila maka-liquidate malagmit nga ang ilang pork barrel gihatag pod nila ngado sa mga peke nga mga organizations! Malagmit nga dunay mga senador nga dili motuman sa mando sa Commission on Audit, busa kinahanglan ang kusog nga tingog sa katawhan.

Ang katawhan adunay katungdanan sa pag-apil sa politika busa kita adunay katungod sa pagpadayag sa atong tingog nga ang atong gipili nga mga senador magbaton sa “culture of transparency” sa ilang paggamit sa kwarta sa katawhan. Pagka-karon, kasagaran sa mga botante nagatan-aw lang sa mga projects/performance ug dili ang integridad sa kandidato. Kung ingon lang niini ang atong panlantaw, nan, mosamot hinoon ang kurapsyon sa sa mga tawo nga anaa sa katungdanan.

Ang atong Santo Papa nagpahimangno usab kanato nga “throwing away leftover food is like stealing from the table of those who are poor and hungry.” (PStar 6/7/13). Sa Biblia mabasa ang “nasalin sa mga pan ug mga isda gihipos sa mga tinun-an” (Mar. 6:43). Kinahanglan nga dili nato usik-usikan ang atong mga salin nga pagkaon. Busa, panahon sa eleksyon, atong susihon kung kinsa sa mga senador ang nag-usik-usik sa kwarta sa katawhan pinaagi sa pork barrel funds.

Fernando A. Saludes