Bag-ong diakono sa Kidapawan gi-ordinahan

KIDAPAWAN CITY—Sulod sa usa ka minuto, mihatag og higayon si Bishop Romulo T. Dela Cruz alang sa paga-ordinahan nga mamalandong kung iyang kabubut-on ang pagpa-ordina sa pagka-diakono ug sa walay pagduha-duha, gitaas ni Rev. Edward Bacus ang iyang kamot ug misenyas og ‘okay’ ngadto sa Obispo.

Ang maong higayon gihatag ni Bishop Dela Cruz tungod adunay pwede pa mahitabo sulod sa usa ka minuto. Gisaysay niya nga sa nahitabong NBA game, nadaug ang Miami Heat kontra San Antonio Spurs sulod lamang sa 20 ka segundo mao nahuna-hunaan niya nga ihatag ang usa ka minuto ngadto sa kandidato sa ordinasyon.

Sa dakong kalipay, nahitabo ang ordinasyon niadtong adlaw sa Hunyo 24, kapistahan ni San Juan nga Magbubunyag didto sa Mary Mediatrix of All Grace Cathedral, ang parokya diin nag-gikan si Rev. Edward Bacus.

Giingon ni Bp. Dela Cruz nga gusto ni Rev. Bacus nga kung ma-ordinahan siya sa pagkapari, mahitabo kini sa kapistahan sa Immaculate Conception, Disyembre 8, nga mao usab ang adlaw sa ordinasyon ni Bp. Dela Cruz sa pagka-pari.

Dugang pa niya nga gawas ni Maria, modelo usab sa pagtoo si San Juan Bautista ug angay nga sundon ang iyang panig-ingnan. Si San Juan Bautista maoy nga nag-una ug nag-andam sa dalan ni Hesus.

“Gi-kulbaaan nga excited,” kini ang giingon ni Rev. Bacus sa wala pa nagsugod ang misa ug rito sa ordinasyon. Giingon usab niya sa iyang rector sa St. Francis Xavier Regional Major Seminary nga si Msgr. Abel Apigo nga upat ka oras lang ang iyang tulog sa milabay’ng gabii tungod sa paghuna-huna sa unsay mahitabo sa adlaw nga siya paga-ordinahan.

Sa iyang pulong-pasalamat, gipasalamatan ni Rev. Bacus ang Ginoo nga maoy nagtawag kaniya sa bokasyon sa pagkapari ug ang pamilya niya nga maoy nag-umol kaniya nga mahimong maayong Kristiyano.

Gi-awhag usab niya ang mga tawo nga padayon sa pag-ampo alang sa ilang kaparian ug mga seminarista nga naghatag sa ilang kaugalingon sa pagserbisyo sa Ginoo.

Si Rev. Bacus nahuman sa iyang pormasyon sa St. Francis Xavier College Seminary ug sa Regional Major Seminary sa Catalunan Grande, Davao City. (John Frances C. Fuentes/@dcherald)