Aggie Livelihood Recovery Project nagtanyag og agri-fairs

MATI CITY – Mikabat og 1330 ka mga mag-uuma ug farm laborers ang nakabenepisyo sa ispisyal nga tanyag sa Agricultural Livelihood Recovery Project alang sa mga biktima sa bagyong Pablo pinaagi sa upat ka mga Agri-Fairs sa Kinablangan, Baganga, Davao Oriental nga gipasiugdahan sa Ad Jesum Development Foundation Inc.(AJDFI) sa dako kaayo nga pagpakig-abag sa Catholic Relief Services (CRS), ingon man sa Dept. of Agriculture (DA), ug Dept. of Agrarian Reform (DAR).

Ang maong Fairs naglangkob sa tulo ka Seed-Fairs ug usa ka Tools-Fair kon diin managlahing mga semilya sa utanon ug sa mais ang gipaninda, mga abono sab, ug mga galamiton sa pagpananom ug pagpamanday.

Kini gipahigayon sa Kinablangan barangay hall, sa likod sa simbahan sa parokya sa Sto. Nino; ug sa matag higayon gisugdan ang mga kalihokan sa kasaulogan sa Balaang Eukaristiya nga gipangulohan ni Fr. Roberto A. Ombon, ang kura paroko.

Gisundan kini sa pagpangrehistro sa mga tawo kon diin gipanghatagan ang matag benepisyaryo og CRS coupon o voucher nga sa unang tulo ka Seed-Fairs nagbalor og tig Php2,000 nga maoy gamiton sa pagbayad sa pagapilion nga produkto ug himan; sa ika-upat ug katapusang Tools-Fair nagbalor ang coupon og Php800 tungod kay ang mga misalmot dili maoy tag-iya sa yuta, kondili laborer niini. Usa ka personahe sa DAR mao say nag-identify sa kasagarang mga CARP beneficiaries, nga misalmot pud sa debris clearing sa 500 ka ektarya nga luna, kon diin usab ang matag usa gigahinan og tulo ka ektarya.

Sumala ni AJDFI Executive Director Sr. Bernadette “Badette” A. Dollete, CSJ, 150 ka mga mag-uuma ang mitambong sa unang Agri-Fair niadtong Mayo 29; 265 ka buok sa ikaduha niadtong Hunyo 10; 165 usab niadtong Hunyo 20 para sa mga taga Isla San Victor, Kinablangan; ug 750 sa katapusang Fair nga milungtad og duha ka adlaw—Hunyo 28-29—aron maalagaran gyud ang labing dakong hut-ong sa mga tawo.

Lakip sa mga semilya mao ang talong, batong, ampalaya, ubp kon short term crops; samtang mga himang gipamalit mao ang guna, sanggot, lagaraw, piko, pala, bara de kabra, grass cutter, rake, sprayer, ubp; kining tanan gikan sa mga local merchant suppliers sa Baganga ug Cateel aron nga matabangan usab sila sa ilang mga negosyo.

Nasayran nga dili momenos og Php12,000 ang kantidad sa kita sa matag  nabaligyaay, gani adunay nakakita og Php64,000 sa tunga-tunga pa lang sa adlaw, sumala pa ni Sr. Badette, ug sa katapusan, tanang mga vouchers gi-encash sa CRS officer.

Human usab sa matag Agri-Fair adunay agricultural training by purok nga ipahigayon sa DA, CRS ug AJDFI; matud pa ang tanan malaumon nga mobunga ang ilahang pagpananom og abunda nga pag-ani paglabay sa tulo ka bulan, sa kaluoy sa Diyos.

BY SR. MARIETTA ALO,OND/CONTRIBUTOR