44th fiesta sa parokya sa Obrero gisaulog

‘Kasing-kasing ni Kristo, tuburan sa pagtoo.’

Kini ang napili nga tema sa parokya sa Sacred Heart of Jesus Parish sa Obrero sa ilang pagsaulog sa ika-44 nga kapistahan sa parokya, Hunyo 7, nga haom sa pagsaulog sa tibuok simbahan sa Tuig sa Pagtoo.

Ang presider sa ulahing misa sa hapon nga si Msgr. Edgar Labagala sa iyang homiliya nag-saysay mahitungod sa usa ka manunulat nga pastor nga kanhing magbalantay sa mga karnero.

Giingon ni Msgr. Labagala nga adunay higayon nga gina-bali sa magbalantay ang tiil sa karnero kung dili kini magpatoo kaniya. Samtang naga-ayo ang nabaling tiil sa karnero, mas mapaduol kini sa iyang magbalantay ug muabot ang higayon nga ang maong karnero maoy mahimong lideres sa grupo.

Giingon ni Msgr. Labagala nga ang Ginoo sama usab sa maong magbalantay nga mubali sa tiil sa karnero pinaagi sa paghatag sa iyang mga binuhat ug mga nagkalain-laing pagsulay. Ug diha sa panahon sa pagsulay maoy higayon nga angay mapaduol ang katawhan sa Ginoo.

Aduna usab giingon si Msgr. Labagala nga mas maayo nga ang tawo mamahimong ‘powerless’ kaysa mahimong ‘hopeless’ kay tungod ang pagkawala sa paglaum, mao usab pagkawala sa pagtoo sa Ginoo. (@dcherald)