1st BEC Vicariate Gathering gipahigayon

Gipahigayon sa Archdiocese of Davao ang unang Basic Ecclesial Communities (BEC) Vicariate Gathering sa St. Francis of Assisi Parish, Ma-a, Davao City, July 13.

Sa pagpangulo sa Auxiliary Bishop of Davao ug pastoral director, Bishop George B. Rimando ug BEC Director Fr. Pedro Lamata, malampuson nga napahigayon ang maong panagtapok sa mga laykong pangulo sa GKK, kaparian ug kamadrehan sa San Pablo Vicariate nga gilangkoban sa mga parokya sa Our Lady of Lourdes, Bangkal; Ascension of the Lord, GSIS Heights; San Isidro Labrador, Catalunan Grande; St. Francis of Assisi, Maa; ug San Pablo, Juna Subdivision.

Subay sa tema nga; “Sa Gagmay’ng Katilingbang Kristohanon, Pagtoo Magmalambuon,” gisaysay sa mga lideres ang mga kusog ug kahuyang sa kahimtang sa mga Gagmay’ng Kristohanong Katilingban (GKK) sa ilang matag parokya.

Si Bishop Rimando nagpasabot sa simbahanong pundasyon sa GKK subay sa pagpanudlo sa Vatican II, 2^nd Plenary Council of the Philippines (PCP II) ug 2nd Archdiocesan Pastoral Assembly of Davao (APAD II). Gihagit usab niya ang mga delegado kung ang mga GKK nahimo bang kahigayonan ug importanteng pagpadayag sa kabag-ohan sa Simbahan (renewal of the Church).

Gihinumdoman usab niya ang mga bunga sa paningkamot sa mga nauna kaniadto ug  gihataga’g gibug-aton ang papel ni Birhen Maria sa mga magtotoo ilabi na sa GKK.

Si Abp. Romulo G. Valles mihatag sa iyang pulong pasalamat ngadto sa mga delegado ug gidayeg niya ang kasamtangang ginahimo nga BEC vicariate gathering isip “process of owning.”

Giingon usab niya nga ang pagka-simbahan sa mga Katoliko resulta sa ilang pagtoo.

“Kining atong pagkamatuohon, it is presumed that we are touched by God. We respond in faith,” sumala ni Abp. Valles.

Gipahimangnua usab niya ang mga nitambong sa tulo ka ministriya sa simbahan: pagkapari, pagkahari ug pagkapropeta.

“We only operate fully if first of all, we realize that our action comes from the presence of God in our midst. That is our by-laws,” dugang ni Abp. Valles.

Giingon ni Abp. Valles nga ang tanang lihok sa GKK kinahanglan nakasentro sa pulong sa Ginoo, kon dili mahimo lamang nga usa ka NGO ang simbahan.

“This is God’s work and we are happy to participate in a segment of unfolding of God’s saving action in history,” dugang ni Abp. Valles. (John Frances C. Fuentes/@dcherald)