Wala pa nahuman ang Pagtugyan sa Mahal nga Birhen

Kon naghunahuna kamo nga nahuman na ang pagtugyan ngadto sa Mahal nga Birhen niadtong petsa 8 sa Hunyo, nasayop gayud kamo. Kon nagmahay kamo nga wala kamo kaapil sa maong panghitabo, ug ulahi na ang tanan, nasayop kamo.

Tinuod nga daghan sa mga kaigsoonan ang tingali wala gayud masayod sa mahinungdanon kaayong hitabo sa kinabuhi sa Simbahan ug sa nasud, diin pinangulohan sa mga Obispo ug kaparian gihimo ang nasudnong pagtugyan ug paghalad sa Pilipinas ngadto sa Putling Kasingkasing ni Maria.

Kadtong mga nakaapil sa ilang tagsa tagsa ka simbahan sa parokya o sa kapilya nila sa GKK, ug nakaapil pa gayud sa hinusang kalihokan sa Katedral uban sa ilang Obispo, nakasinati gayud sa kamakahuluganon ug kamahinungdanon kaayo sa gihimo sa Simbahan alang sa nasud – ang pagtugyan ug paghalad sa tibuok nasud alang sa iayng kaluwasan ug kalingkawasan sa tanang matang sa kadautan ug sala nga nagbalot ug naggapos sa katawhan sa kapanahonan karon.

Dili pa ulahi ang tanan alang sa wala moapil ug wala makaapil. Ang maong pagtugyan ug paghalad giplano nga paggahimoon pa gihapon sa sunod nga lima ka bulan sugod sa Hulyo hangtod Nobiyembre. Sa matag unang Sabado sa bulan, sulod sa Santos nga Misa, human sa pagkalawat, himoon sa tanan ang minubo nga pagtugyan ug paghalad. Pinsaikad kini sa hangyo sa Birhen sa Fatima nga saulogon ang 5 ka unang Sabado sa bulan sa Pag-ampo, Reparasyon ug Konsagrasyon.

Kabahin kining maong kalihokan sa nagapadayon nga pagsaulog sa Tuig sa Pagtoo nga matapos sa Nobiyembre 24,  karong tuiga –  ang Pangilin sa Kristong Hari. Ug mamahimong maayong higayon kining adlawa, mahimong adlaw usab nga hiniusang pagbag-o sa gihimo nang nasudnong pagtugyan ug paghalad  niadtong Hunyo 8, 2013.

Sa laing bahin, magpadayon ang nobena sa siyam ka tuig nga pagpangandam alang sa pagsaulog sa ika- 500 nga kasumaran sa pagsugod sa pagtoo dinhi sa Pilipinas sa tuig Marso 16, 2021,. sa tinuig nga  Pangilin sa Putling Kasingkasing ni Maria, gitakda nga bag-ohon kanunay ang nasudnong pagtugyan sa tanang simbahang lokal sa Pilipinas.

Samtang ginahimo kining binulan ug tinuig nga pagbag-o sa pagtugyan ngadto sa Putling Kasingkasing ni Maria, ang mapadayonong paghatag og impormasyon ug pormasyon sa katawhan mahitungod sa mensahe sa Bierhen sa Fatima, sa 5 ka Unang Sabado sa bulan,  bahin sa kamahinungdanon sa Paga-ampo, Reparasyon, ug sa konsagrasyon, kinahanglan kayo nga ipahigayon ug han-ayon sa tanang hut-ong sa Simbahan, ilabi na alang sa mga kabataan ug kabatan-onan.