Gipahigayon sa St. Francis of Assisi Parish, Maa ang awarding ceremony sa mga nakalampos sa ilang Computer Literacy Program, June 16. Gikalipay sa mga beneficiary ang ilang kalamposan aron mas makakita sila og oportunidad sa trabaho gamit ang ilang natun-an sa maong training. (Photo courtesy of Joemar Faelnar)
Training sa PPI sa St. Mary’s Parish gipahigayon
Mitambong ang 44 ka Pangulo sa Pagpahigayon sa Impormasyon (PPI) sa St. Mary of the Perpetual Rosary Parish sa gipahigayong Media Baby ka Ba? workshop, Hunyo 9.
Ang mga PPI naggikan sa nagkalain-laing Gagmay’ng Kristohanong Katilingban (GKK) sa parokya diin nagtuon sila unsaon pag-gama sa storya mahitungod sa GKK ug parokya nga i-mantala sa ilang parish newsletter nga gihinganla’g Ang Rosaryohan.
Sa pagpangulo ni Walter Valencerina, Coordinator sa Media Baby ka Ba? Program sa Davao Catholic Herald, malampuson nga napahigayon ang maong training alang sa mga PPI nga gipangulohan sa ilang coordinator nga si Elizabeth Sabucido.
Gitun-an sa grupo ang mga pamaagi sa DCHerald sa paghimo og artikulo nga adunay tumong sa pagpahibalo ug pangsangyaw sa Maayong Balita.
Gawas sa training mahitungod sa paghimo og balita, gipahigayon usab ang lecture mahitungod sa social media diin gipahibalo sa grupo ang mga maayong butang nga mahimo sa saktong paggamit sa internet ug social media.
Malaumon ang DCHerald nga mapalambo sa PPI sa St. Mary’s Parish ang ilang mantalaan aron mas mapadayag sa kadaghanan ang Maayong Balita ug mga maayong butang nga nahimo sa GKK ug sa parokya. (@dcherald)
No Comments