Training sa ‘module’ sa Tuig sa Pagtuo gipahigayon sa Tibungco

Inubanan sa duha ka Obispo sa Archdiocese of Davao, malampuson nga napahigayon ang trainors’ training sa ‘module’ sa Tuig sa Pagtoo sa St. James Vicariate didto sa St. Francis Xavier Parish sa Tibungco, Davao City.

Si Abp. Romulo G. Valles nangulo sa nagpaambit sa mga lideres sa St. James Vicariate mahitungod sa pagsaulog sa Tuig sa Pagtoo ug ang kamahinungdanon sa pagdiskobre pag-usab ug pagtuon sa unod sa pagtoong Katoliko.

Ang module sa Year of Faith naglangkob sa pagpasabot sa Porta Fidei, Vatican II ug mga dokumento niini, ang kalambigitan sa Vatican II ug Catechism of the Catholic Church, ug pagtuon sa CCC.

Ang trainors’ training ginapadagan sa mga vicariate sa Archdiocese of Davao ug nahitabo ang unang higayon niadtong Mayo 18 sa St. Francis of Assisi Maa alang sa San Pablo vicariate..

Kauban ni Abp. Valles sa trainors’ training sa Tibungco si Bishop George B. Rimando ug si Msgr. Abel Apigo.

Makita sa panagway sa mga lideres nga malipayon sila nga nakauban nila ang duha nila ka Obispo sa maong higayon, sumala sa facilitator sa training nga si Vicky Anghag sa Pastoral Office sa Archdiocese of Davao.

Dugang pa niya nga ang pagpadagan sa module sa Tuig sa Pagtoo usa ka mapamalandongon ug maampoon nga paagi sa pagtuon ug pagdiskobre pag-usab sa pagtoo sa matag binunyagang Katoliko.

Himoon ang trainors’ training sa mga umaabot nga bulan sa ubang vicariate sa Archdiocese. Kini mahitabo hangtud sa pagtapos sa kasaulogan sa Tuig sa Pagtoo.

Ang mga trainors usab ang magpadagan sa pagpasabot ug katekesis sa Year of Faith sa ilahang tagsa-tagsa ka mga parokya. (@dcherald)